აზერბაიჯანისა და სომხეთის დელეგაციები სომხეთის ქალაქ გორისში 8 ოქტომბერს შეხვდნენ და "ტრამპის მარშრუტის" პროექტის ფარგლებში ელექტროგადამცემი ხაზების მშენებლობა განიხილეს. როგორც OC-Media წერს, ბოლო პერიოდში სომხეთი რუსეთთან და თურქეთთანაც მოლაპარაკებებს აწარმოებს ელექტროენერგიის მიწოდების წყაროების დივერსიფიკაციის მიზნით.

მათივე ცნობით, შეხვედრა კიდევ ერთი ნიშანია იმისა, რომ ათწლეულების განმავლობაში არსებული კონფლიქტის შემდეგ ორ ქვეყანას შორის ურთიერთობები თანდათან უმჯობესდება. აზერბაიჯანის პრეზიდენტმა, ილჰამ ალიევმა, აგვისტოში განაცხადა, რომ აზერბაიჯანმა შესაძლოა სომხეთისთვის ელექტროენერგიის მიწოდება დაიწყოს. ალიევის თქმით, სომხეთი საბჭოთა პერიოდში აშენებული მეტსამორის ატომური ელექტროსადგურის ექსპლუატაციას განუსაზღვრელი ვადით ვერ გააგრძელებს და მისი გაჩერების შემთხვევაში შესაძლოა ელექტროენერგიის დეფიციტის წინაშე აღმოჩნდეს.

ალიევის განცხადებას სომხეთის პრემიერმინისტრი ნიკოლ ფაშინიანი გამოეხმაურა. მან აღნიშნა, რომ ამჟამად სომხეთში ელექტროენერგიის ჭარბი წარმოებაა, თუმცა ეკონომიკის მზარდმა მოთხოვნებმა შესაძლოა მომავალში ერევანი ელექტროენერგიის იმპორტის საჭიროების წინაშე დააყენოს.

"ტრამპის მარშრუტი", რომლის ოფიციალური სახელწოდებაა "ტრამპის მარშრუტი საერთაშორისო მშვიდობისა და კეთილდღეობისთვის"“ (TRIPP), სომხეთსა და აზერბაიჯანს შორის, აშშ-ის შუამავლობით მიღწეული შეთანხმების საფუძველზე უნდა შეიქმნას. პროექტი აზერბაიჯანს მის ექსკლავ ნახიჩევანთან სომხეთის ტერიტორიის გავლით დააკავშირებს. მარშრუტი, სავარაუდოდ, მოიცავს რკინიგზას, საავტომობილო გზას, მილსადენებს, ელექტროენერგეტიკულ ინფრასტრუქტურასა და ციფრული მონაცემების გადაცემის ქსელებს.

ალიევის განცხადებით, აზერბაიჯანელმა სპეციალისტებმა სომხეთის ტერიტორიაზე წინასწარი კვლევები ჩაატარეს და ელექტროგადამცემი ხაზების საყრდენების განთავსებისთვის შესაძლო ადგილები განსაზღვრეს. მან ასევე აღნიშნა, რომ აზერბაიჯანიდან სომხეთის გავლით ნახიჩევანში ელექტროენერგიის გადასაცემი ხაზის მშენებლობა უკვე შეიძლება დაიწყოს და მის დასრულებას მაქსიმუმ ექვსი თვე დასჭირდება.

ამავდროულად, სომხეთის მთავრობა ატომური ელექტროსადგურის მომავალსაც განიხილავს. მეტსამორის ატომური ელექტროსადგურის ექსპლუატაციის მოქმედი ვადა 2036 წელს იწურება, თუმცა ფაშინიანმა თებერვალში განაცხადა, რომ მისი მუშაობის გაგრძელება 2046 წლამდე შეიძლება.