ევროკომისარი საგარეო და უსაფრთხოების საკითხებში კაია კალასი აშშ-ის მიერ ICC-ის სანქცირებას გამოეხმაურა. მან X-ზე დაწერა, რომ ICC-ის დაცვა ევროკავშირის პრიორიტეტად რჩება. კალასმა აღნიშნა ისიც, რომ სასამართლოს პრეზიდენტს, ტომოკო აკანეს ესაუბრა.

"სისხლის სამართლის საერთაშორისო სასამართლო მართლმსაჯულების სისტემის ქვაკუთხედია. ის დევნის იმ პირებს, რომლებიც პასუხისმგებელნი არიან საერთაშორისო სამართლით გათვალისწინებულ ყველაზე მძიმე დანაშაულებზე.

აშშ-ის მიერ სანქციების დაწესების განზრახვის გამოცხადების შემდეგ, ვესაუბრე სისხლის სამართლის საერთაშორისო სასამართლოს პრეზიდენტს, ტომოკო აკანეს. ექვსთვიანი პერიოდი ზომების ძალაში შესვლამდე დიალოგის შესაძლებლობას იძლევა.

ევროკავშირი ყოველთვის მხარს უჭერდა სასამართლოს და ევროკავშირს აქვს ვარიანტები უზრუნველყოს, რომ მან შეძლოს თავისი სასიცოცხლოდ მნიშვნელოვანი საქმიანობის გაგრძელება. ICC-ის დაცვა ევროკავშირის პრიორიტეტად რჩება", — დაწერა კაია კალასმა.

შეგახსენებთ, აშშ-ის პრეზიდენტ დონალდ ტრამპის ადმინისტრაციამ პარასკევს სისხლის სამართლის საერთაშორისო სასამართლოს (ICC) სანქციები დაუწესა. ეს ნაბიჯი სასამართლოს ერთ-ერთი ყოფილი მოსამართლისთვის მშვიდობის დარგში ნობელის პრემიის მინიჭებიდან სულ რამდენიმე საათში გადაიდგა.