თბილისის მერის, კახა კალაძის აზრით, მომავლის რწმენა, იმედი, საახალწლოდ მორთული ქუჩები და ერთმანეთისადმი სოლიდარობა დაასუსტებს "უხილავ მტერს", ანუ კორონავირუსს. ამის შესახებ მან მაშინ განაცხადა, როცა აღნიშნა, რომ ხალხის თხოვნის გამო, საახალწლო განათებები ე.წ. კომენდანტის საათის დროსაც ანთებული იქნება.

"რა არის ჩვენი მთავარი იარაღი პანდემიასთან ბრძოლის დროს? — რა თქმა უნდა, კარგი განწყობა, სულიერი სიმხნევე, ადამიანების სითბო და სიყვარული.

როგორ უნდა შევხვდეთ ახალ წელს? შეშინებულები და დათრგუნულები? რა თქმა უნდა, არა. ჩვენი მომავლის რწმენა, იმედი, საახალწლოდ მორთული ქუჩები, ერთმანეთისადმი სოლიდარობა, რა თქმა უნდა, დაასუსტებს ამ უხილავ მტერს და ნაძვის ხის ანთების დროს ვთქვი და კიდევ ერთხელ მინდა გავიმეორო, რომ ზუსტად ხალისი, ბავშვების ჟრიამული, კისკისი არის ის, რისიც ყველაზე მეტად ეშინია ამ ვირუსს", — განაცხადა მან ვიდეომიმართვაში.

კალაძის თქმით, ფეისბუქგვერდზე არაერთმა ადამიანმა მიწერა და თხოვა, რომ განათებები არ გაეთიშათ და მერიაში იმსჯელეს იმაზე, რომ ღამით ამ განათებებს "ბრძოლის წინა ხაზზე" მყოფი პირები ნახულობენ.

"თითქოს თბილი და მყუდრო ქუჩები ამ ადამიანების დაღლილობას, სტრეს მალამოდ დაედება, გაათბობს და იმედით აღავსებს. შესაბამისად, ჩვენ ვითვალისწინებთ ამ მოთხოვნებს, თითოეული თბილისელის სურვილს, დარჩეს ჩვენი ქალაქი განათებული და დღეიდან ქალაქში საახალწლო ილუმინაციები არ გამოირთვება", — განაცხადა მან.

თბილისის მერმა სულ რაღაც 2 დღის წინ, 17 დეკემბერს თქვა, რომ განათებები გადაადგილების შეზღუდვის დროს, ანუ საღამოს ცხრა საათიდან დილის ხუთამდე გათიშული იქნებოდა, რადგან მოსახლეობა მის ნახვას ვერ შეძლებდა. მისი თქმით, ამ დროს ანთებული მხოლოდ ნაძვის ხე იქნებოდა.