თბილისის მერის, კახა კალაძის განცხადებით, საკოორდინაციო საბჭოსთან განიხილავენ, გადაადგილების შეზღუდვამ ღამის 11 ან 12 საათამდე გადაიწიოს. ამის შესახებ მან ჟურნალისტებს მაშინ განუცხადა, როცა ე.წ. კომენდანტის საათის დროს ანთებულ ნაძვის ხეზე საუბრობდა.

"რაც შეეხება კომენდანტის საათს, რომ 9 საათის შემდეგ იზღუდება გადაადგილება ქალაქში, 24-მდე ჩვენ გვექნება არაერთი შეხვედრა საკოორდინაციო საბჭოში და იქნება საუბარი და განხილვა, თუ იქნება მიზანშეწონილი, საკომენდანტო საათი გადაიწიოს 11 ან 12 საათამდე", — განაცხადა მან.

მთავრობის გადაწყვეტილებით, ქვეყნის მასშტაბით, 21:00 საათიდან აკრძალულია გადაადგილება, როგორც ქვეითად, ასევე, მანქანით. გადაადგილება მხოლოდ სპეციალური საშვის მქონე პირებს შეუძლიათ. როგორც მთავრობაში ამბობენ, აუცილებლობის შემთხვევაში, შესაძლებელია ერთდღიანი საშვების აღება.