იუსტიციის სამინისტროს ინფორმაციით, გიორგი რურუას ცემის საქმეზე გენერალურმა ინსპექციამ №8 პენიტენციური დაწესებულების 2 თანამშრომელი დააკავა.

"გენერალური ინსპექციის აღმოსავლეთის საგამოძიებო სამმართველოში 2020 წლის 16 ნოემბერს დაწყებული გამოძიებით დადგინდა, რომ აღნიშნულმა პირებმა სამსახურებრივი მოვალეობა შეასრულეს არაჯეროვნად, მისდამი დაუდევარი დამოკიდებულების გამო, რასაც შედეგად მოჰყვა ამავე დაწესებულებაში მოთავსებული მსჯავრდებულის გიორგი რურუას ჯგუფურად ცემა და რამაც ამ უკანასკნელის უფლების და სახელმწიფოს კანონიერი ინტერესების არსებითი დარღვევა გამოიწვია",— ნათქვამია განცხადებაში.

სამინისტროს ინფორმაციით, ბრალდებულები სისხლის სამართლის კოდექსის 342-ე მუხლის პირველი ნაწილით დააკავეს, რაც სამსახურებრივ გულგრილობას გულისხმობს. უწყების ცნობით, საქმეზე გრძელდება გამოძიება.

2 ნოემბერს გიორგი რურუაზე ციხეში თავდასხმა განხორციელდა. ამის შესახებ ინფორმაცია ერთიანი ნაციონალური მოძრაობის წევრმა, სალომე სამადაშვილმა, ფორმულას ეთერში გაავრცელა.