ლელოს ერთ-ერთი წევრი, ანა ნაცვლიშვილი თბილისის მერს, კახა კალაძეს "ექსკურსიაზე" საჯაროდ იწვევს, რათა თბილისში "უკანონო მშენებლობები აჩვენოს". აღნიშნული განცხადება ნაცვლიშვილმა რუსთავი 2-ის ეთერში გააკეთა.

"თუ კახა კალაძეს მეტი უკანონო მშენებლობა არ უნახავს, საჯაროდ ვიწვევ მას ექსკურსიაზე თბილისში, მე ვაჩვენებ მშენებლობებს, რომელიც მხოლოდ ფულის ძალით არის კანონიერად გამოცხადებული. მათ შორის, ჩემი სახლის წინ გამოცხადებულ ძალიან დიდ უკანონო კორპუსს თემქაზე", — აცხადებს ნაცვლიშვილი.

დღეს თბილისის მერიამ სამგორის რაიონში, აფრიკის დასახლებაში უკანონო შენობების დემონტაჟი დაიწყო. მათი ინფორმაციით, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 ფაქტი გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დაკავებულია 8 ადამიანი.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებას.

ამავე თემაზე: