მთავარი არხის დირექტორის, ნიკა გვარამია თქმით, მისი ოჯახის წევრებზე ასეთი ღია და პირდაპირი მუქარა, თან საჯაროდ არავის გამოუთქვამს. ასე გამოეხმაურა იგი, იუსტიციის ყოფილი მინისტრის, თეა წულუკიანის განცხადებას, სადაც მან გვარამიას ოჯახი ირონიულად მოიხსენია.

გარდა ამისა, ნიკა გვარამიამ წულუკიანი დისკრიმინაციულად მოიხსენია და აღნიშნა, რომ თუ უკანონო თვალთვალი და პირადი ხელშეუხებლობა გარეგნული კრიტერიუმებით იზომება, მაშინ, როცა იგი სახლიდან გამოდის "ქუჩაში თავს როგორ არ უჭეჭყავენ". ამის შესახებ მან საკუთარ ფეისბუქზე დაწერა.

"რას ამბობთ? უთვალთვალებენ? მზეთუნახავი ჰყავს სახლში, რომ უთვალთვალებენ, თუ რატომ არის გაღიზიანებული", — ასე გამოეხმაურა იუსტიციის ყოფილი მინისტრი და პარლამენტის მოქმედი დეპუტატი, თეა წულუკიანი მთავარი არხის დირექტორის, ნიკა გვარამიას განცხადებას, რომ მის ოჯახს უთვალთვალებენ.

მთავარი არხის დირექტორი, ნიკა გვარამიას თქმით, მას შეუთვალეს, რომ ახალ წლამდე დაიჭერდნენ და რუსთავი 2-ისთვის ზიანის ანაზღაურების მიზეზით მთელ ქონებას ჩამოართმევენ.

როგორც იგი წერს, ეს ინფორმაცია მიწოდებილია ფასილიტატორი ელჩებისთვისაც და დაკავების მიზეზად მისი "ანტიდასავლური პოზიცია" დაუსახელეს.