საქართველოს პრეზიდენტმა, სალომე ზურაბიშვილმა მე-10 მოწვევის პარლამენტის პირველ სხდომაზე სიტყვით გამოსვლის დროსაც ისაუბრა იმაზე, რომ ქვეყანაში ინსტიტუტებს თავს ესხმიან. ერთ-ერთ ინსტიტუად მან პატრიარქი დაასახელა. მისი თქმით, ეკლესიასა და პატრიარქზე თავდასხმა "ჩვენი სულიერი სიმტკიცის შერყევას ემსახურება".

"სახელმწიფო ძლიერი მაშინ არის როდესაც მას აქვს ძლიერი ინსტიტუტები. დღევანდელი თავდასხმა ყველა ინსტიტუტზე, რომელიც ჩვენი იდენტობის, დემოკრატიის, უსაფრთხოების, სტაბილურობის ღერძი და ქვეყნის მომავლის ქვაკუთხედია არის სახელმწიფოსთვის დესტრუქციული.

ეს ინსტიტუტებია — პატრიარქი, რომელიც ჩვენი სულიერი ენერგიისა და ეროვნული სიმხნევის წყაროა; ჩვენი ეკლესია, რომელმაც საუკუნეების მანძილზე გადაარჩინა ქართველი ერის იდენტობა და ერთიანობა, გზა გაუხსნა დამოუკიდებლობას. მათი დისკრედიტაცია ჩვენი სულიერი სიმტკიცის შერყევას ემსახურება!" — განაცხადა მან.

გარდა ამისა, პრეზიდენტმა ისაუბრა ჯარის, პოლიციის, პარლამენტის, პრეზიდენტის და პარლამენტის ინსტიტუტის დისკრედიტაციის მცდელობაზეც.

დღეს, 11 დეკემბერს პარლამენტში მე-10 მოწვევის სხდომა მიმდინარეობს, რომელშიც მხოლოდ ქართული ოცნება იღებს მონაწილეობას. სხდომაზე ასევე არიან მიწვეული პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი ესწრება.

პარალელურად, მოსწავლე ახალგაზრდობის სასახლის ეზოში ოპოზიციის ნაწილი მანდატებზე უარს ამბობს და ხელს აწერს საერთო მემორანდუმს ბოიკოტის შესახებ.