გირჩის ერთ-ერთი ლიდერის, იაგო ხვიჩიას თქმით, ბავშვთა პორნოგრაფიაში მონაწილე მსახიობის გარჩევა მაყურებლისთვის მარტივი არ არის. მისივე თქმით, არასრულწლოვანი მსახიობი არ ნიშნავს ბავშვს.

"მაგალითად, შეგიძლია გაარჩიო 18-ის და 17 წლის? [...] სად ინერვიულოს ამ ხალხმა რამდენი წლის ასაკის მონაწილეა მსახიობი. არასრულწლოვანი, ჯერ ერთი, რატომ ნიშნავს ბავშვს არის", — განაცხადა ხვიჩიამ მთავარი არხის ეთერში.

ხვიჩიას აზრით, აბსურდია ის ფაქტი, რომ პორნო დისკის შესყიდვით მომხმარებელი ახალისებს პორნოინდუსტრიას.

"მომხმარებელი რანაირად შეიძლება იყოს თანამონაწილე?", — იკითხა მან.

ხვიჩიამ აღნიშნა ისიც, რომ ცილისწამებაა იმის თქმა, რომ ის ბავშვთა პორნოგრაფიის მომხრეა.

"როგორ შეიძლება რამის ყურების გამო, რამე ვნახო მე და ამან გამხედოს კრიმინალი. ეს ხომ აბსურდია", — განაცხადა მან.

ეს პირველი შემთხვევა არ არის, როდესაც ხვიჩია ბავშვთა პორნოგრაფიაზე საუბრობს. რამდენიმე კვირის წინ მის განცხადებას კრიტიკა მოჰყვა, როცა ის გამოეხმაურა ადამიანის დაკავებას, რომელსაც ბრალად ედება წინასწარი შეცნობით არასრულწლოვნის გამოსახულების შემცველი პორნოგრაფიის შეძენა, შენახვა, ფლობა და სარგებლობა. მან ამ ამბავზე 29 ნოემბერს ფეისბუქზე პოსტი გამოაქვეყნა, სადაც წერდა "პორნო გადმოწერა, დაასეივა, ერთხელაც გადაწყვიტა ესარგებლა და დაიჭირეს? სულ გააფრინეს". სწორედ ამ პოსტს მოჰყვა მოქალაქეების, მათ შორის გირჩის მხარდამჭერების უკმაყოფილება და ხვიჩიას მიმართ კრიტიკა.

გაიგეთ მეტი: