საქართველოში მოქმედი ბიზნეს ასოციაციაციის წარმომადგენლებისთვის თბილისი ენერჯის მიერ კომერციული მომხმარებლებისთვის გაზის გაძვირება გაუგებარია. თბილისი ენერჯის ამ გადაწყვეტილებას 7 ბიზნეს ასოციაცია უარყოფითად აფასებს.

"განსაკუთრებით გაუგებარია ამ გადაწყვეტილების მიღება ახლა, უმძიმესი ეკონომიკური კრიზისის დროს, რომელიც გამოწვეულია კორონავირუსის პანდემიის გავრცელების დიდი მასშტაბით ჩვენს ქვეყანაში და მთელს მსოფლიოში. ახლა, როცა თითქმის ყველა ბიზნესი გაჩერებულია და დაზარალებული დარგები მუდმივად მიმართავენ მთავრობას სხვადასხვა სახის დახმარებებისა და შეღავათების გაწევის მოთხოვნით, თბილისი ენერჯი იღებს მოულოდნელ და შეუთანხმებელ გადაწყვეტილებას და ბიზნესზე ახორციელებს სრულიად გაუმართლებელ დამატებით წნეხს და უზრდის ისადაც მაღალ კომუნალურ გადასახადს", — აცხადებენ ბიზნეს ასოციაციის წარმომადგენლები.

მოქმედი რეგულაციების მიხედვით, კომერციული სექტორისთვის ტარიფების დაწესება არ ეროვნული მარეგულირებლის მიერ არ რეგულირდება, რაც ბიზნეს ასოციაციაში, ასევე, უცნაურად მიაჩნიათ.

"მაგრამ აქ გასათვალისწინებელია ერთი მნიშვნელოვანი ფაქტორი — განსხვავებით ჩვეულებრივი სტანდარტული ეკონომიკური საქმიანობისგან, ამ შემთხვევაში საქმე გვაქვს ბუნებრივ მონოპოლიასთან, რომლის ესა თუ ის გადაწყვეტილება მკვეთრ ზეგავლენას ახდენს ქვეყნის მთელს ეკონომიკაზე და მასში ჩართულ ყველა სუბიექტზე", — აცხადებენ ისინი.

ბიზნეს ასოციაციაში ფიქრობენ, რომ გაზის ტარიფის გაძვირება პროდუქციის თვითღირებულების და შესაბამისად, სარეალიზაციო ფასების ზრდას გამოიწვევს, რასაც საყოფაცხვრებო მომხმარებელი საკუთარ ჯიბეზე მყისიერად იგრძნობს. მათივე თქმით, ამ ე.წ. საყოფაცხოვრებო მომხმარებლების აბსოლუტური უმრავლესობა დასაქმებულია სწორედ იმ კომპანიებში, რომლებსაც ახლა დამატებითი უზრმაზარი ხარჯი უჩნდებათ.

ასოციაციაში აცხადებენ, რომ კომპანიები იძულებულნი იქნებიან კიდევ უფრო შეამცირონ ან დასაქმებულების რაოდენობა ან მათი ხელფასები, რაც ნიშნავს, რომ არაპირდაპირ, მაგრამ ეს პროცესი მთელს მოსახლეობას შეეხება და მნიშვნელოვნადაც დააზარალებს.

ისინი თბილისი ენერჯის ხელმძღვანელ პირებთან შეხვედრასა და მათგან განმარტებას მოითხოვენ შემდეგ 2 საკითხზე:

• რატომ ხდება კონკრეტულად ამ ოდენობით — 0,24 ლარით ტარიფის გაძვირება და
• წარმოდგენილ იქნას ტარიფის დათვლის მეთოდოლოგია, თუ რა კომპონენტებისგან შედგება ესა თუ ის ტარიფი და როგორია ხარჯების სტრუქტურა კომპანიაში.

ბიზნეს ასოაციაციის წარმომადგენლები, ასევე, მიმართავენ მავრობას, დროულად ჩაერიოს ამ საკითხის მოგვარებაში და გამოიყენოს მის ხელთ არსებული ყველა ბერკეტი პროცესის დასარეგულირებლად.

განცხადებას ხელ აწერენ:

• ევროკავშირი-საქართველოს ბიზნეს საბჭო გადასახადის;
• გადამხდელთა კავშირი;
• საქართველოს მწარმოებელთა ფედერაცია;
• დისტრიბუტორთა ბიზნეს ასოციაცია;
• საქართველოს დამსაქმებელთა ასოციაცია;
• საქართველოს სასტუმროებისა და რესტორნების ფედერაცია;
• რესტორატორთა ასოციაცია.

შპს თბილისი ენერჯი 2021 წლის 3 იანვრიდან კომერციული მომხმარებლებისთვის, პურის საწარმოების გარდა, გაზის ტარიფს აძვირებს. კომპანიაში აცხადებენ, რომ არასაყოფაცხოვრებო აბონენტებისთვის ბუნებრივი აირის ფასი ერთ კუბურ მეტრზე 1 ლარითა და 10 თეთრით განისაზღვრება, დამატებული ღირებულების გადასახადის ჩათვლით.

კომპანიაში, აღნიშნავენ, რომ ბუნებრივი აირის ფასი საყოფაცხოვრებო მომხმარებლებისთვის არ ძვირდება, რომელიც 1 კუბურ მეტრზე 0,461374 ლარს შეადგენს და დადგენილია სემეკის მიერ.

თბილისი ენერჯის მიერ კომერციული მომხმარებლებისთვის გაზის გაძვირებაზე ეკონომიკის მინისტრმა, ნათია თურნავამ 3 დეკემბერს განაცხადა, რომ ამაზე კომპანიას დაელაპარაკებიან. თურნავას თქმით, მოსახლეობის მიმართულებით ბუნებრივი აირის ტარიფის გაძვირებას არ ელოდებიან, თუმცა ამბობს, რომ გასარკვევია, რამდენად ეყრდნობა რეალურ გარემოებებს თბილისი ენერჯის გადაწყვეტილება.