ბრიუსელში აქტივისტებმა გაეროს ბავშვთა კომიტეტის წევრად სოფიო კილაძის არჩევა გააპროტესტეს.

"მას შემდეგ, რაც გაერომ სოფიო კილაძე ბავშვთა უფლებების კომიტეტის წევრად აირჩია, ჩნდება კითხვა, თუ რამდენად ითვალისწინებს გაერთიანებული ერების ორგანიზაცია უმცირესობების წარმომადგენელი ბავშვების უფლებებს?! კილაძე ცნობილია მისი დისკრიმინაციული განცხადებებით და აქტივისტებზე სიტყვიერი თავდასხმებით", — წერს ადამიანის უფლებათა დამცველი არასამთავრობო ორგანიზაცია DROA Community.

აქტივისტების პოსტერებზე ვკითხულობთ: ძვირფასო გაერო, რატომ უგულებელყავით 53 არასამთავრობო ორგანიზაციის განცხადებას? ძვირფასო გაერო, რატომ შეწყვიტე ქვიარ-ბავშვებზე ზრუნვა?

ფოტო: DROA Community

ეს პოსტერები ბრიუსელში გაეროს რეგიონული ოფისის შენობაზე აქტივისტებმა დღეს გააკრეს. ორგანიზაციია DROA Community ითხოვს განმარტებას, თუ რატომ ახდენს ერთ-ერთი უდიდესი საერთაშორისო ორგანიზაცია ჰომოფობიის ლეგიტიმაციას საქართველოში?

სოფო კილაძე მეცხრე მოწვევის პარლამენტში ადამიანის უფლებათა და სამოქალაქო ინტეგრაციის კომიტეტის თავმჯდომარე იყო. მისი კანდიდატურა ბავშვთა კომიტეტში ხელისუფლებამ ივნისში წარადგინა. აღსანიშნავია, კილაძე არ ყოფილა ქართული ოცნების არჩევნების პარტიულ სიაში.

კილაძის კანდიდატურის წარდგენას კრიტიკით შეხვდნენ ბავშთა უფლებებზე მომუშავე ორგანიზაციები. ადამიანის უფლებებზე მომუშავე 52 არასამთავრობო ორგანიზაციამ კი გაეროს ბავშვის უფლებათა კომიტეტს მიმართა, რომ პარლამენტის დეპუტატი სოფო კილაძე ახალ წევრად არ აერჩიათ.

როგორც ხელმომწერი ორგანიზაციები აცხადებდნენ, ბავშვის უფლებათა კომიტეტის წევრობის კანდიდატის შერჩევისას გაეროს რეკომენდაციები პროცედურებთან შედარებით გათვალისწინებული არ იყო.

არასამთავრობო ორგანიზაციებს მიაჩნდათ, რომ კილაძე არ უნდა აერჩიათ კომიტეტის წევრად, რადგან მისი კვალიფიკაცია, რეპუტაცია და შერჩევის პროცესში გაეროს რეკომენდაციების დარღვევა ამის საფუძველს არ იძლეოდა. ამასთან, ორგანიზაციები აღნიშნავდნენ, რომ სოფო კილაძე მნიშვნელოვან კრიტერიუმებს ვერ აკმაყოფილებს და არ აქვს მაღალი ექსპერტული ცოდნა ბავშვის უფლებების დაცვის სფეროში.