პანამაში 7.7 მაგნიტუდის სიმძლავრის მასშტაბური მიწისძვრა მოხდა, რამაც შენობების დაზიანება და ძლიერი ბიძგები გამოიწვია.

აშშ-ის გეოლოგიური სამსახურის (USGS) ცნობით, მიწისძვრის შედეგად საშუალო და ძლიერი სიმძლავრის ბიძგები დაახლოებით 4.6 მილიონმა ადამიანმა იგრძნო.

სტიქია ადგილობრივი დროით დაახლოებით 15:00 მოხდა. ეპიცენტრი სამხრეთ-ცენტრალურ პანამაში, ქალაქ პიტალოზა არიბადან დაახლოებით 10 კმ-ის დაშორებით მდებარეობდა.

გავრცელებულ კადრებში ჩანს, რომ პენონომეს კათედრალის ერთ-ერთი მხარე ბიძგების გამო ჩამოინგრა. სხვა ვიდეოში ჩანს ადგილობრივი სასტუმრო, რომელიც თითქმის მთლიანად ჩამოინგრა.

მიყენებული ზიანის სრული მასშტაბი ჯერჯერობით უცნობია, თუმცა პირველადი მიწისძვრის მახლობლად რამდენიმე ძლიერი განმეორებითი ბიძგიც დაფიქსირდა, რამაც შესაძლოა ვითარება ადგილზე კიდევ უფრო გაართულოს.

მიწისძვრის კერა სულ რაღაც 12 კმ-ის სიღრმეზე დაფიქსირდა (რაც უფრო მცირეა მიწისძვრის სიღრმე, მით უფრო მაღალია ზედაპირზე მძიმე შედეგების გამოწვევის ალბათობა).

ეპიცენტრიდან დაახლოებით 200 კმ-ის დაშორებით მდებარე დედაქალაქ პანამა სიტიში შენობებიდან მრავალი ადამიანის ევაკუაცია განხორციელდა. ბიძგების შეწყვეტამდე ისინი ქუჩებსა და მახლობელ პარკებში იყვნენ გამოსულები.

პანამის პრეზიდენტმა ხოსე რაულ მულინომ განაცხადა, რომ მთელი მისი მთავრობა მობილიზებულია მიწისძვრაზე რეაგირებისთვის და დასძინა: "მომხდარი არ უნდა იქნეს გამოყენებული განგაშისა თუ არეულობის დასათესად".

პანამის არხი — ატლანტისა და წყნარი ოკეანეების დამაკავშირებელი სასიცოცხლოდ მნიშვნელოვანი წყლის გზა — მიწისძვრას არ დაუზიანებია, განაცხადა უწყებამ, რომელიც საზღვაო მოძრაობას ზედამხედველობს.