მსჯავრდებული გიორგი დავითაძის დედა, ირმა დავითაძე პროკურატურის განცხადებას გამოეხმაურა, სადაც უწყება აღნიშნავს, რომ გამოძიება დასრულებულია, ვინაიდან მსჯავრდებულის მიმართ N6 პენიტენციურ დაწესებულებაში არანაირ ძალადობას არ ჰქონია ადგილი.

ირმა დავითაძის თქმით, გამოძიებაზე პრემიერმინისტრი ირაკლი კობახიძის მიერ "გაგზავნილმა მესიჯებმა" იმოქმედა. მსჯავრდებულის დედამ აღნიშნა, რომ ბრძოლას საქართველოს ფარგლებს გარეთ გააგრძელებს.

"9 თვეა ველი გამოძიებას და სამი დღის წინ კობახიძის გამოსვლამ და ბრძანებამ, რომ სასწრაფოდ დაესრულებინათ ეს გამოძიება შედეგმაც არ დააყოვნა, დააგვირგვინა. ანუ გაუგზავნა მესიჯები, რომ დაასრულებთ დროზე, ისე როგორც არის საჭირო და როგორც ჩვენს ხელისუფლებას შეეფერებაო. გადმომცენ სასწრაფოდ ეს მათი გამოძიებული ფარსი და დასრულებული გამოძიება და რა თქმა უნდა მე ვაგრძელებ ბრძოლას და რა თქმა უნდა, საქართველოში არა", — თქვა ირმა დავითაძემ (მის სიტყვას "ფორმულა" ავრცელებს).

შეგახსენებთ, საქართველოს პროკურატურის განცხადებით, რუსთავის №6 პენიტენციურ დაწესებულებაში მოთავსებული მსჯავრდებულის, გიორგი დავითაძის მიმართ განხორციელებული სავარაუდო ძალადობის საქმეზე გამოძიება დასრულდა. უწყების ცნობით, მოპოვებულმა მტკიცებულებებმა დაადასტურა, რომ რაიმე სახის დანაშაულებრივ ქმედებას ადგილი არ ჰქონია.

ცნობისთვის, რომ გიორგი დავითაძე, რომელიც რუსთავის №6 პენიტენციურ დაწესებულებაში იხდის სასჯელს, აცხადებს, რომ დეესკალაციის ოთახში მასზე რამდენიმე ბადრაგმა სექსუალურად იძალადა. პენიტენციური სამსახური ბრალდებას კატეგორიულად უარყოფს. უწყებამ 2 ოქტომბერს გაავრცელა ვიდეოკადრები, სადაც მათი თქმით, გიორგი დავითაძის დეესკალაციის ოთახში შეყვანაა ასახული. კადრებში ჩანს დავითაძის ძალით შემოწმება და ფიზიკური დაპირისპირება, თუმცა ჩანაწერს ხმა არ აქვს.