მთავრობის კანცელარიასთან ტრანსგენდერმა ქალებმა აქცია გამართეს. მათი თქმით, კოვიდრეგულაციების პირობებში სამსახურის დაკარგვის გამო საკვების, საცხოვრებლისა და მედიკამენტების გარეშე რჩებიან. ტრანსგენდერმა ქალებმა კანცელარიაში განცხადება შეიტანეს.

"ვინაიდან გვუწევს უკიდურეს გაჭირვებაში ცხოვრება საბაზისო საჭიროებების გარეშე, როგორიც არის საცხოვრებელი, საკვები, მედიკამენტები, გთხოვთ, რომ ჩვენი გასაჭირი და პრობლემები მიიტანოთ გულთან და ამ პანდემიის პირობებში, ვიდრე არსებული აკრძალვები არ დასრულდება, გთხოვთ მოგვაქციოთ ყურადღება, რადგან ვართ ყველაზე მოწყვლადი ჯგუფ, არ შეგვხებია არცერთი ანტიკრიზისული გეგმა. ამავდროულად ტრანსგენდერი ადამიანის 90% ვიყავით სექს სამუშაოზე თვითდასაქმებულები და შეძლებისდაგვარად გაგვქონდა თავი. არსებული მდგომარეობის გამო აღარ გვაქვს ამის შესაძლებლობა, ამიტომ გთხოვთ მოგვაქციოთ ყურადღება, გთხოვთ არ გაგვწიროთ შიმშილისთვის, სიცივისთვის და სიკვდილისთვის", — წერია განცხადებაში.

აქციის მონაწილეების თქმით, შექმნილი მდგომარეობის გამო მათ სახლის ქირის გადახდის შესაძლებლობაც არ აქვთ.

"უნდა ვაიძულოთ სახელმწიფო, რომ თავის დაკისრებული საერთშორისო ვალდებულებები შეასრულოს და მიხედოს უმცირესობას. მაქსიმუმ საქართველოში არის 100 ტრანსგენდერი, 80 არის, მაგრამ ჩავთვალოთ, რომ გამოგვრჩა ვიღაც და არის 100. ეს 100 ადამიანი არის ყველაზე მოწყვლადი მთელს ქვეყანაში. რა გახდა ამათი დაკმაყოფილება ეს კითხვა გვაქვს სახელმწიფოსთან. დღეს შეიტანეს ტრანსგენდერმა ქალებმა განცხადება კანცელარიაში, დაელოდებიან პასუხს დაახლოებით 10 დღე და შემდეგ, როგორც ამბობენ, უკიდურეს ზომებს მიმართავენ", — განაცხადა აქციაზე პარტიზანული მებაღეობის დამფუძნებელმა, ნატა ფერაძემ.

კანცელარიაში განცხადება 100-მდე ტრანსგენდერმა ქალმა შეიტანა.