დაავადებათა კონტროლის ეროვნული ცენტრის ხელმძღვანელი, ამირან გამყრელიძე ამბობს, რომ ჯანდაცვის სისტემას ხარვეზები აქვს, მაგრამ დღეს დამნაშავეები არ უნდა ვეძებოთ. ამის შესახებ მან TV პირველის ეთერში ისაუბრა. მისვე თქმით, დეკემბერი და იანვარი იქნება მძიმე და საჭიროა კონსოლიდაცია.

"ერთად უნდა ვიბრძოლოთ და არ უნდა ვეძებოთ დამნაშავეები დღეს. ამის დრო მოვა. დღეს ისეთივე კონსოლიდაცია უნდა იყოს, როგორც გაზაფხულზე. მძიმე დეკემბერი იქნება, მძიმე იანვარი იქნება. სანამ ვაქცინა არ შემოვა საქართველოში და არ აიცრება მოსახლეობის დაახლოებით 20-25% მაინც, მანამდე ეს ჭირი არ დაანებებს კაცობრიობას თავს, თუ თვითონ არ მოხდა, რაც ახასიათებს ზოგიერთ ამ ტიპის ინფექციას, რომ ციკლი დაამთავროს ვირუსმა", — განაცხადა გამყრელიძემ.