საქართველოს ეროვნული ბანკი (სებ) კიდევ ერთხელ ეხმიანება სებ-ის საბჭოს წევრის, ნანა ყეინიშვილის მიერ სამეწარმეო საქმიანობაში შესაძლო უკანონო მონაწილეობის ფაქტს და სრულად ემიჯნება აღნიშნულს. ეროვნული ბანკის მიერ გავრცელებულ ინფორმაციაში წერია, რომ სებ-ის მაღალი რეპუტაციული სტანდარტიდან გამომდინარე, საბჭომ ერთხმად მიიღო გადაწყვეტილება ნანა ყეინიშვილის სებ-ის საბჭოს საქმიანობაში მონაწილეობიდან აცილების შესახებ გამოძიების დასრულებისა და ობიექტური ჭეშმარიტების დადგენამდე.

უწყების განცხადებით, ნანა ყეინიშვილი მოქმედებდა მარტო, რასაც კომპანიის წარმომადგენლის მიერ გაკეთებული აუდიოჩანაწერიც ადასტურებს, სადაც ის თავად საუბრობს საკუთარ გეგმებსა და მიზნებზე.

სებ წერს, რომ ვირტუალური აქტივის მომსახურების პროვაიდერების ზედამხედველობა სებ-ში არ განეკუთვნებოდა ნანა ყეინიშვილის საკურატორო მიმართულებას, შესაბამისად, მას გადაწყვეტილების მიღების პროცესზე გავლენა ვერ ექნებოდა.

ეროვნული ბანკის ცნობით, სებ-ის ზედამხედველობას დაქვემდებარებული სუბიექტების შემოწმება მკაცრად კონფიდენციალურია და ინფორმაციაზე წვდომა მხოლოდ შესაბამის გუნდს აქვს. გარდა ამისა, ნანა ყეინიშვილი იყო საბჭოს არააღმასრულებელი წევრი და არ გააჩნდა ოპერატიული მართვის მანდატი.

ეროვნული ბანკის განმარტებით, ვირტუალური აქტივის მომსახურების პროვაიდერ შპს "ბიტექსჩეინჯის" შემოწმება და დაჯარიმება გეგმიურად, 2026 წლის თებერვალში განხორციელდა. შესაბამისად, კომპანიის წარმომადგენლის განცხადება, თითქოს დაჯარიმება სებ-ისთვის მიწოდებულ ინფორმაციას უკავშირდება, უსაფუძვლოა და საზოგადოების შეცდომაში შეყვანას ისახავს მიზნად.

სებ წერს, რომ კომპანიას ფულის გათეთრებისა და ტერორიზმის დაფინანსების აღკვეთის წესისა და სხვა არაერთი დარღვევისთვის ჯამში 572 118 000 ლარის ფულადი ჯარიმა დაეკისრა, ხოლო ორ ადმინისტრატორს — თითოეულს დამატებით 7 000 ლარი.

სებ-ის ცნობით:

1. ჯარიმების უდიდესი ნაწილი (572 033 000 ლარი) მომხმარებელთა იდენტიფიკაციისა და ვერიფიკაციის მოთხოვნების დარღვევას უკავშირდება. თვითმომსახურების კიოსკების მეშვეობით ოპერაციები ხორციელდებოდა კანონმდებლობით დადგენილი წესის დარღვევით, კლიენტის ვინაობის გადამოწმების გარეშე.

2. ტრანზაქციების შესწავლისას გამოვლინდა, რომ ვირტუალური აქტივის მიმღებ ზოგიერთ მისამართთან დაკავშირებით საჯარო წყაროებში (მათ შორის Telegram არხებით) იძებნებოდა ინფორმაცია აკრძალული ნივთიერებების სავარაუდო რეალიზაციასთან შესაძლო კავშირის შესახებ.

3. გამოვლინდა მნიშვნელოვანი ხარვეზები კომპანიის მონაცემთა აღრიცხვის, დამუშავების, სანქცირებული პირების გადამოწმებისა და საეჭვო ოპერაციების გამოვლენის სისტემებში. კომპანიამ ფინანსური მონიტორინგის სამსახურს არ წარუდგინა ანგარიშგება ორი საეჭვო ოპერაციის შესახებაც.

4. შემოწმების ფარგლებში კომპანიამ ეროვნულ ბანკს არასწორი და არასრული ინფორმაცია წარუდგინა, რამაც შეაფერხა შემოწმების პროცესი.

ვრცლად ამ თემაზე: