დონალდ ტრამპისა და ვლადიმერ პუტინის რუსული დიზელის იმპორტთან დაკავშირებულ შეთანხმებას ოფიციალური ლონდონი გამოეხმაურა. გაერთიანებული სამეფოს მთავრობის პრესსპიკერმა განცხადება გაავრცელა, სადაც ხაზგასმულია, რომ ლონდონი უკრაინის მხარდაჭერასა და რუსეთზე სანქციებით ზეწოლას განაგრძობს.

"გაერთიანებული სამეფოს პოზიცია არ შეიძლება უფრო ნათელი იყოს. გავაგრძელებთ საერთაშორისო პარტნიორებთან მჭიდროდ მუშაობას, რათა უკრაინას საჭირო სამხედრო და ფინანსური მხარდაჭერა ჰქონდეს საკუთარი თავის დასაცავად. ასევე შევინარჩუნებთ რუსეთზე ზეწოლას ყველაზე მძიმე სასანქციო რეჟიმით, რომელიც გაერთიანებულ სამეფოს ოდესმე აუმოქმედებია, რითაც პუტინის აგრესიის ფასს გავზრდით და დავეხმარებით სამართლიანი და მყარი მშვიდობის მიღწევის ძალისხმევებს.

უკრაინამ არაერთხელ აჩვენა, რომ ის სერიოზულად ეკიდება მშვიდობას, მაგრამ რუსეთმა არაერთხელ უარყო მთლიანი და ნაწილობრივი ცეცხლის შეწყვეტები, და ამავდროულად აგრძელებს უკრაინელი სამოქალაქო პირებისა და ენერგეტიკის წინააღმდეგ დარტყმებს.

რუსეთს დღესვე შეუძლია ამ ომის დასრულება. მზად ვართ მხარი დავუჭიროთ უკრაინას იმდენ ხანს, რამდენიც საჭირო იქნება და პარტნიორებთან ვიმუშაოთ მყარი მშვიდობის მისაღწევად", — აღნიშნულია განცხადებაში.

ცნობისთვის, ტრამპის განცხადებით, პუტინი დათანხმდა, რომ "ამერიკულ და გლობალურ ბაზარზე" დაუყოვნებლივ გათავისუფლდეს 300 000 ტონა დიზელი, რასაც ნოემბერში 500 000 ტონა, ხოლო შემდეგ კიდევ ერთი მილიონი ტონა მოჰყვება.

ზელენსკის შეფასებით, ეს შეთანხმება რუსეთის პრეზიდენტ ვლადიმერ პუტინისთვის მიძღვნილი საჩუქარია, რაც "ინვესტიციაა ომში, რომელიც უნდა დასრულდეს და არა გაგრძელდეს".