მცხეთის სამედიცინო ცენტრში 24 წლის პაციენტი კორონავირუსით გარდაიცვალა. გარდაცვლილის ოჯახი მთავარ არხთან ამბობს, რომ ის Covid-19-ით მცხეთის საავადმყოფოში დაინფიცირდა. ოჯახის წევრები მომხდარზე პასუხისმგებლობას საავადმყოფოს აკისრებენ.

"მესამედ, რომ გაუკეთეს ტესტი მერე გვითხრეს, რომ ნინო კოვიდით იყო დაინფიცირებული. დაგვირეკეს, რომ ფილტვები გაეთიშა. გარდაცვალების მიზეზად გვითხრეს, რომ ჰქონდა შაქარი, რაც წლების განმავლობაში არ აწუხებდა, სიმპტომი არ ჰქონია. დედას მისწერა, რომ ყურადღებას არ აქცევდნენ, წყალი უნდოდა, საღამოს საათები იყო და ექიმებს ეუბნებოდა წყალი მაინც შემომიტანეთო და არც ერთი ექიმი არ შედიოდა. სამართლიანობას მოვითხოვთ და რა თქმა უნდა, ამას ასე არ დავტოვებთ. 24 წლის გოგო წამებით მოკლეს, არ მომკვდარა ნინო მოკლეს", — ამბობს გარდაცვლილი გოგოს ბიძაშვილი, მარიამ გულიკაშვილი.

ინფორმაციის გადამოწმებას On.ge-მ მცხეთის სამედიცინო ცენტრში დილის 10:00 საათიდან ცდილობს. კლინიკაში გვითხრეს, რომ შესაბამის კომპეტენტურ პირთან გადაგვამისამართებდნენ. მათ პასუხს მიღებისთანავე შემოგთავაზებთ.

მანამდე კი მცხეთის სამედიცინო ცენტრის კლინიკურმა ხელმძღვანელმა, ლიკა მუმლაძემ მთავარ არხთან განაცხადა, რომ გარდაცვლილ ახალგაზრდას თანმხლები დაავადება, შაქრიანი დიაბეტი ჰქონდა, რაც მისი თქმით ოჯახმა რ იცოდა.

"მას არ ჰქონდა დადასტურებული შაქრიანი დიაბეტი. მათ არ იცოდნენ, ჩვენ აღმოვაჩინეთ, რომ გოგონას ჰქონდა შაქრის ციფრები მაღალი. მე არ მსურს, მისი ახლობლების არაკომპეტენტურ კომენტარებზე გავაკეთო შესაბამისი კომენტარი. ამ დაავადებას ახასიათებს მძიმე გართულებები. მე არ შემიძლია ვილაპარაკო ჩემი კლინიკის ბრალეულობაზე. ოჯახის წევრებს შეუძლია მოვიდნენ, ჩვენ კიდევ ერთხელ გავესაუბრებით, ავუხსნით. მას ერთხელ აქვს PCR ტესტირება ჩატარებული და დადგინდა კორონავირუსის ინფექცია," — ამბობს მუმლაძე.

3 დეკემბრის მონაცემებით, ბოლო 24 საათის განმავლობაში კორონავირუსის 4 260 ახალი შემთხვევა დადასტურდა, გამოჯანმრთელდა — 2 947 ადამიანი, გარდაიცვალა — 45.

პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა 147 636-ს შეადგენს, ჯამში გამოჯანმრთელებულდა — 124 568, გარდაიცვალა— 1 387.