უკრაინის საგარეო საქმეთა მინისტრი, ანდრეი სიბიგა დონალდ ტრამპის განცხადებას პასუხობს. ტრამპმა განაცხადა, რომ დროა უკრაინას ახალი პრეზიდენტი ჰყავდეს.

"პრეზიდენტი ზელენსკი ომის დროს უძღვება ჩვენს ერს — ომს დამოუკიდებლობის, თავისუფლებისა და ღირსებისთვის.

ვოლოდიმირ ზელენსკის უკრაინელი ხალხის მხარდაჭერა აქვს და გადაწყვეტილების მიღების უფლებაც სწორედ მათ აქვთ. საზღვარგარეთიდან გაკეთებული განცხადებები მხოლოდ ადასტურებს, რომ ის თავის საქმეს კარგად ასრულებს. ის მხარდაჭერას იმსახურებს," — განაცხადა სიბიგამ.

შეგახსენებთ, თეთრი სახლის წინ ჟურნალისტებთან საუბრისას ტრამპმა აღნიშნა, რომ უკრაინის პრეზიდენტ ვოლოდიმირ ზელენსკის რუსეთ-უკრაინის კონფლიქტის მოგვარების მრავალი შესაძლებლობა ჰქონდა, თუმცა მან ამ გზით არ წასვლა არჩია.

აშშ-ის ლიდერმა უკრაინას ურჩია, ეპოვა ახალი ლიდერი, რომელიც რუსეთთან შეთანხმებას შეძლებდა.

დონალდ ტრამპმა ასევე განაცხადა, რომ ზელენსკი მთელი მსოფლიოსთვის პრობლემების შექმნას ცდილობს რუსული ნავთობგადამამუშავებელი ქარხნების სამიზნედ ქცევით.