"ალბათ მომავალ წელს ნობელის პრემიას ჰამასის ბომბების დამამზადებელს
გადასცემენ" — ასე ეხმაურება ჭადრაკის მსოფლიოს ყოფილი ჩემპიონი გარი კასპაროვი უფლებამადცველ ნავი პილეისთვის ნობელის მშვიდობის პრემიის გადაცემას.

მიმდინარე წლის 9 ოქტომბერს ნორვეგიის ნობელის კომიტეტმა ის ამ უმაღლესი ჯილდოთი საერთაშორისო სამართლისა და მშვიდობის განმტკიცებაში შეტანილი განსაკუთრებული წვლილისთვის დააჯილდოვა.

2021-2025 წლებში პილეი გაეროს დამოუკიდებელ საერთაშორისო საგამოძიებო კომისიას ოკუპირებული პალესტინის ტერიტორიაზე სათავეში ედგა. კომისია გაეროს ადამიანის უფლებათა საბჭომ საერთაშორისო სამართლის სავარაუდო დარღვევების გამოსაძიებლად ჩამოაყალიბა

კომისიის დასკვნით, ისრაელმა ღაზაში გენოციდი ჩაიდინა, ხოლო ისრაელის პრემიერმინისტრმა ბენიამინ ნეთანიაჰუმ და ყოფილმა თავდაცვის მინისტრმა იოავ გალანტმა თავიანთ გამოსვლებსა და განცხადებებში "გენოციდი წაახალისეს".

ისრაელმა უარყო პილეის დასკვნები და კომისიის სამივე წევრი "ჰამასის მარიონეტობაში" დაადანაშაულა.

კომისიამ ასევე დაასკვნა, რომ ჰამასმა და სხვა პალესტინურმა შეიარაღებულმა დაჯგუფებებმა 2023 წლის 7 ოქტომბერს ომის დანაშაულები და საერთაშორისო სამართლის სხვა მძიმე დარღვევები ჩაიდინეს, რასაც დაახლოებით 1 200 ადამიანი ემსხვერპლა, ხოლო 251 მძევლად აიყვანეს. ამავე ანგარიშში ისრაელიც იყო დადანაშაულებული ომის დანაშაულებში.

პილეისთვის პრემიის გადაცემას პარასკევს ისრაელის საგარეო საქმეთა სამინისტრო გამოეხმაურა და აღნიშნა, რომ ეს წარმოადგენდა "ჯილდოს გროტესკულ გამოყენებას იარაღად ანტიისრაელური სიძულვილისა და მიკერძოებულობის ლეგიტიმაციისთვის".

"მის მიერ ისრაელის დაუნდობელ, პოლიტიკურად მოტივირებულ დემონიზაციასა და გენოციდის შესახებ სიცრუის ტირაჟირებაში იერიშის მიტანაში შეტანილი წვლილი თავად მეტყველებს ყველაფერზე," — წერს ისრაელის საგარეო უწყება.