11 ოქტომბერს, უკრაინულმა დრონებმა რუსეთის ქალაქ ვლადიმირში მდებარე Yandex-ის მსხვილ მონაცემთა ცენტრზე იერიში მიიტანეს. რუსულმა ტექნოლოგიურმა გიგანტმა Yandex-მა განაცხადა, რომ თავდასხმის შედეგად ობიექტის ინფრასტრუქტურა დაზიანდა. დარტყმის შემდეგ შენობაში ხანძარი გაჩნდა, რის გამოც ცენტრმა მუშაობა სრულად შეაჩერა.

"დრონების თავდასხმის შედეგად ვლადიმირში მდებარე Yandex-ის მონაცემთა ცენტრის ინფრასტრუქტურა დაზიანდა. მონაცემთა ცენტრის მუშაობა სრულად შეჩერებულია. დაშავებულები არ არიან, ადგილზე უკვე მუშაობენ შესაბამისი სამსახურები და შედეგებს ლიკვიდაციას უწევენ.

რესურსების დარჩენილ კონფიგურაციას არასტაბილურად ვთვლით. პლატფორმის მუშაობის რეჟიმი ავარიულია — გირჩევთ გამოიყენოთ ავარიული აღდგენის ნებისმიერი ალტერნატიული გეგმა. ტექნიკურ მხარდაჭერასთან კომუნიკაციის არხებმა შესაძლოა არასტაბილურად იმუშაოს. Yandex Cloud-ის გუნდი მუშაობს სერვისების ფუნქციონირების აღდგენაზე," — წერს კომპანია.

8 ოქტომბერს, უკრაინულმა დრონებმა იერიში მიიტანეს რიაზანის ოლქის ქალაქ სასოვოში მდებარე Yandex-ის მონაცემთა ცენტრზე, რამაც ხანძარი გააჩინა და ობიექტი სრულად გაათიშა. ამ დარტყმამ მწყობრიდან გამოიყვანა სერვერული ინფრასტრუქტურა, რომლითაც სარგებლობდა რუსეთის რკინიგზა (RZhD), მობილური ოპერატორი MegaFon-ი და რამდენიმე ეროვნული მედიასაშუალება.

მომდევნო დღეს, 9 ოქტომბერს, უკრაინულმა დრონებმა მოსკოვის სამხრეთ-დასავლეთით მდებარე რეგიონულ ცენტრ კალუგაში Yandex-ის კიდევ ერთ ობიექტზე იერიში მიიტანეს.

უკრაინული მედიის ცნობით, საწყისი დარტყმების შემდეგ Yandex-მა თავისი ციფრული რუკების პლატფორმიდან წაშალა რუსეთის ოთხ რეგიონში მდებარე მონაცემთა ცენტრების ლოკაციები.

უკრაინის თავდაცვის სამინისტრო მონაცემთა ცენტრებზე თავდასხმებს ადასტურებს. უწყების განაცხადებით, აღნიშნულმა ქმედებამ "შესაძლოა აიძულოს რუსეთი, გადაამისამართოს რესურსები დაზიანებული სიმძლავრეების შესაკეთებლად".

უკრაინის პრეზიდენტ ვოლოდიმირ ზელენსკის განმარტებით, უკრაინა მონაცემთა ცენტრებზე რუსეთის ანალოგიურ თავდასხმებს "სარკისებურად" პასუხობს.