სპეციალური პენიტენციური სამსახური რეზო კიკნაძის განცხადებას ზარების შეზღუდვის შესახებ უარყოფს. სამსახურმა NEWS.On.ge-ის განუცხადა, რომ "არანაირი შეზღუდვა სატელეფონო ზარებზე მას არ აქვს და ამიტომ გაუგებარია, რატომ ავრცელებს ამ ინფორმაციას".

სამსახურმა ასევე დასძინა, რომ "მსჯავრდებულს შეუძლია გამოითხოვოს და გაასაჯაროოს მისი სატელეფონო საუბრების ამონაწერი, საიდანაც ნათლად გამოჩნდება, როდის აქვს ბოლოს სატელეფონო ზარი განხორციელებული".

სინდისის პატიმარი რევაზ კიკნაძე ციხიდან წერს, რომ 2 თვეა ციხეში ზარების უფლება შეუზღუდეს. კიკნაძე აღნიშნულს მსჯავრდებული გიორგი დავითაძისთვის სოლიდარობის გამოხატვას უკავშირებს.

"ციხემ დაბლოკა დედაჩემის და იმ ორი ყველაზე ახლობლის ნომერი, ვისთანაც ვრეკავდი ყოველ ჯერზე. ბოლო ორი თვე ზარების გარეშე დამტოვეს. მიზეზი არ ვიცი. სავარაუდოდ, ვოისი რომ ჩავწერე დავითაძის მხარდასაჭერად, ეგ უნდა იყოს ამ უმსგავსობის სათავე. დედაჩემის ნომერს რას ერჩოდნენ? სულ გარეკეს, მგონი," — წერს კიკნაძე.