საქართველოს პრეზიდენტის, სალომე ზურაბიშვილის განცხადებით, გიგი წერეთელმა საქართველო-აზერბაიჯანის საზღვრის საკითხზე ეუთოს საპარლამენტო ასამბლეის პრეზიდენტის რანგში ისაუბა, ეს კი "რაც არსებობს, ყველა პროტოკოლის" დარღვევაა.

ზურაბიშვილი ამბობს, რომ არ შეიძლება, გარე ფუნქციიდან ისაუბრო იმ თემაზე, რომელზეც მოლაპარაკებები მიმდინარეობს.

"მინდა, ერთი კომენტარი გავაკეთო იმ კომენტარზე, რაც გიგი წერეთელმა გააკეთა და ისაუბრა, როგორც ეუთოს ასამბლეის თავმჯდომარემ, იმ საკითხზე, რაც ეხება ჩვენს საზღვრებს, სადაც მიმდინარეობს მოლაპარაკებები კომისიის ფარგლებში. არ შეიძლება, სხვა პოსტიდან, გარე ფუნქციიდან ისაუბრო იმ თემაზე, რომელიც დღეს არის, სადაც არიან ჩვენი წარმომადგენლები ჩართული", — საზოგადოებრივი მაუწყებლის ცნობით, განაცხადა ზურაბიშვილმა.

რადიო თავისუფლების ინფორმაციით, გიგი წერეთელი, რომელიც ეუთო-ს ასამბლეის პრეზიდენტი და ევროპული საქართველოს წევრია, ბაქოში აზერბაიჯანის პრეზიდენტ ილჰამ ალიევს და პარლამენტის თავმჯდოამრე ოგტაი ასადოვს შეხვდა. გიგი წერეთელის განცხადებით, შეხვედრაზე სხვა საკითხებთან ერთად დავით გარეჯის თემაზეც ისაუბრეს, რადგან "ეს საკითხი მნიშვნელოვანია და ინტერესს იწვევს".