ალბათ ყველაფერი მეხუთე კლასში დაიწყო როდესაც ჩემი პირველი კოდი დავწერე. არასდროს დამავიწყდება ის ემოცია, როცა მივხვდი, რომ ჩემივე შექმნილი რაღაც, ადამიანზე გაცილებით უკეთესად ასრულებდა დავალებას. მაშინვე გადავწყვიტე რომ გამოვიდოდი პროგრამისტი. საბედნიეროდ ჩემს სკოლას სერიოზული დონის ინფორმატიკის საოლიმპიადო წრეები ჰქონდა და ბავშვობიდან მოყოლებული მე და ჩემი მეგობრები სხვადასხვა ალგორითმებს ვსწავლობდით.

მეათე კლასიდან დაწყებული პროგრამირების ოლიმპიადებში მონაწილეობიდან ნელ-ნელა ჩემი ცოდნის რეალურ სამყაროში გამოყენება დავიწყე და ამ პერიოდიდან მოყოლებული დღემდე ათობით პროექტი შევქმენი სხვადასხვა პროგრამულ ენაში სხვადასხვა პლათფორმაზე, რომელიც დღესაც უმარტივებს ადამიანებს ცხოვრებას.

საქართველოში ამერიკული უნივერსიტეტის შემოსვლა ძალიან გამიხარდა. ვიცოდი, რომ სან დიეგოს უნივერსიტეტი ფართო შესაძლებლობებს მომცემდა. მესამე კურსზე გადავწყვიტე გაცვლით პროგრამით სან დიეგოს კალიფორნიის კამპუსში წასვლა. კალიფორნიაში წამოსვლამდე საქართველოში ჩემს მეთორმეტე სამსახურს მოვრჩი და მესამე კურსზზე ახალ გარემოში ახალი გამოწვევების მისაღებად ვიყავი მზად.

ყოველთვის ისეთ მიზნებს ვისახავდი რისი მიღწევაც ჩემთვის იმ ეტაპზე შეუძლებელი ჩანდა, არასდროს ვჩერდებოდი და ყოველთვის მეტისთვის ვშრომობდი. ყოველთვის მჯეროდა რომ ადრე თუ გვიან მაინც მივაღწევდი დასახულ მიზანს. სწორედ ერთერთი ასეთი მიზანი იყო ფეისბუკში მუშაობა. კომპანიაში რომელიც მთელს სამყაროს ერთმანეთთან აკავშირებს, რომელიც მასში ათობით ათასობით პროექტს აერთიანებს და რომელშიც მუშაობა ძალიან ბევრი პროფესიონალი პროგრამისტის ოცნებაა.

კალიფორნიაში ჩამოსვლიდან ერთ კვირაში დამიკავშირდნენ რეკრუიტერები, ჯამში ორი ტექნიკური ინტერვიუ ჩამიტარდა რომელშიც გამოცადეს ჩემი შესაძლებლობები პროგრამირების საოლიმპიადო ამოცანების ოპტიმალურ ამოხსნაში და სხვადასხვა ტექნიკური კითხვებით გამოიკვლიეს ჩემი სამუშაო გამოცდილების დეტალები. ორივე ინტერვიუს სავარაუდო დროზე ადრე მოვრჩი. ბოლოს ისღა მქონდა დარჩენილი პასუხს მოთმინებით დავლოდებოდი. საშუალოდ ყოველწლიურად ფეიბუკში 250 000 აპლიკაცია შედის სოფტვეარ დეველოპმენტის განხრით და სტატისტიკურად მხოლოდ 0.132% ს ღებულობენ რაც სირთულის დონით ერთერთი ყველაზე რთულად მისაღწევი წარმატებაა, მაგალითად ჰარვარდის უნივერსიტეტი მიღებული აპლიკაციების 5.4% ღებულობს რაც 40-ჯერ მეტი გამოდის. პასუხს დიდად არ დაუგვიანია.

ბოლო ინტერვიუდან ერთ კვირაში მივიღე შემოთავაზება ვიმუშაო ფეისბუკის მთავარ ოფისში, მენლო პარკში, სილიკონის ველზე სოფტვეარ დეველოპერად. რეკრუიტერმა მოლოცვისას მითხრა რომ დიდი ალბათობით მარკსაც შევხვდები მთავარ კამპუსში რაზეც რაც პროგრამირება დავიწყე ვოცნებობდი. უკვე დარწმუნებული ვარ წინ კიდევ ბევრი ძალიან საინტერესო გამოწვევა მელის და მზად ვარ დავხვდე მათ როგორც ფეისბუკის ოჯახის ახალი წევრი.