9 ოქტომბერს რუსეთის ფედერაციის საგარეო საქმეთა მინისტრის მოადგილემ, მიხაილ გალუზინმა, ვიდეოკონფერენციის ფორმატში შეხვედრა გამართა ამიერკავკასიაში უსაფრთხოებისა და სტაბილურობის საკითხებზე საერთაშორისო დისკუსიების თანათავმჯდომარეებთან. ამის შესახებ ინფორმაციას რუსეთის საგარეო უწყება ავრცელებს.

მათი ცნობით, საქართველოს ოკუპირებული ტერიტორიების, აფხაზეთისა და სამხრეთ ოსეთის უსაფრთხოების უზრუნველსაყოფად საჭიროა ძალისხმევის გაძლიერება. ამ მიზნით, პირველ რიგში, ოფიციალურმა თბილისმა სოხუმისა და ცხინვალის წინააღმდეგ ძალის გამოუყენებლობის გარანტიები უნდა გასცეს. ამასთან, მოსკოვი საჭიროდ მიიჩნევს ოკუპირებულ ტერიტორიებთან საზღვრების დელიმიტაციის პროცესის დაწყებას, რასაც შემდგომში მათი დემარკაცია უნდა მოჰყვეს.

"ნოემბერში დაგეგმილი დისკუსიების მორიგი რაუნდის მოსამზადებლად მხარეებმა დეტალურად განიხილეს ამ მნიშვნელოვანი მოლაპარაკების ფორმატის დღის წესრიგში არსებული აქტუალური საკითხები.

რუსულმა მხარემ კიდევ ერთხელ გაუსვა ხაზი აფხაზეთისა და სამხრეთ ოსეთის მტკიცე უსაფრთხოების უზრუნველსაყოფად ძალისხმევის გაძლიერების აუცილებლობას.

პრაქტიკული თვალსაზრისით, ყურადღება უნდა გამახვილდეს კონკრეტული ზომების შემუშავებაზე, პირველ რიგში, ოფიციალური თბილისის მიერ სოხუმისა და ცხინვალის წინააღმდეგ ძალის გამოუყენებლობის გარანტიების გაცემაზე, ასევე საქართველო-აფხაზეთისა და საქართველო-სამხრეთ ოსეთის სახელმწიფო საზღვრების დელიმიტაციის პროცესის დაწყებაზე, რასაც შემდგომში მათი დემარკაცია უნდა მოჰყვეს", — წერია უწყების მიერ გავრცელებულ ინფორმაციაში.

მიხაილ გალუზინთან ერთად შეხვედრას ესწრებოდნენ: გაეროს გენერალური მდივნის თანაშემწე ხაიათ ხიარისთან (ტუნისი), ეუთოს მოქმედი თავმჯდომარის სპეციალურ წარმომადგენელთან სამხრეთ კავკასიის საკითხებში, კარელ შპეტთან (შვეიცარია) და სამხრეთ კავკასიაში ევროკავშირის სპეციალურ წარმომადგენელთან, მაგდალენა გრონოსთან (ჩეხეთი).