გორის მუნიციპალიტეტის სოფელ ზემო ნიქოზში, 11-16 ოქტომბერს, ანიმაციური ფილმების მე-13 საერთაშორისო ფესტივალი "ნიქოზი" იმართება. ფესტივალი 2011 წლიდან ყოველწლიურად ტარდება და მისი დამფუძნებელი და ორგანიზატორი ნიქოზის წმინდა ალექსანდრე ოქროპირიძის სახელობის ხელოვნების სკოლაა. ფესტივალის დაარსების იდეა ნიქოზისა და ცხინვალის მიტროპოლიტ ისაიას ინიციატივით, 2008 წლის რუსეთ-საქართველოს ომის შემდეგ აღდგენილი ანიმაციის სტუდიისა და ხელოვნების სკოლის საქმიანობის ფარგლებში გაჩნდა.

წლევანდელი ფესტივალი ქრისტიანობის სახელმწიფო რელიგიად გამოცხადების 1700 წლისთავს ეძღვნება. მისი თემაა "მემკვიდრეობიდან მომავლისკენ", ხოლო მთავარ გზავნილად გიზო ნიშნიანიძის ლექსის სტრიქონი — "რაც გვყოფს კი არა, რაც გვაერთიანებს" — არის შერჩეული. ორგანიზატორების ჩანაფიქრით, ფესტივალი ქრისტიანული მემკვიდრეობის, კულტურისა და იმ ღირებულებების გააზრებას ემსახურება, რომლებიც თაობებს ერთმანეთთან აკავშირებს.

ნიქოზის ფესტივალის ერთ-ერთი მთავარი თავისებურება ისაა, რომ იგი საკონკურსო ფორმატით არ იმართება და გამარჯვებულებს არ ავლენს. მისი მიზანია სხვადასხვა ქვეყნის თანამედროვე და კლასიკური ანიმაციური ფილმების წარმოჩენა, ანიმაციის სფეროში მიმდინარე პროცესების გაცნობა, ხელოვანთა შორის გამოცდილების გაზიარება და ახალგაზრდების დაინტერესება ანიმაციის ხელოვნებით. კინოჩვენებებს თან ახლავს მასტერკლასები, შეხვედრები, გამოფენები, კონცერტები და საგანმანათლებლო ღონისძიებები.

ფესტივალის პროგრამა:

ექვსდღიანი პროგრამა სხვადასხვა ქვეყნის ანიმაციურ ფილმებს აერთიანებს. 12 ოქტომბერს მაყურებელს გერმანიის ბაბელსბერგის კონრად ვოლფის სახელობის კინოუნივერსიტეტის სტუდენტური ნამუშევრები, დრეზდენის მოკლემეტრაჟიანი ფილმების საერთაშორისო ფესტივალის საბავშვო ფილმები და პოლონური ანიმაციის პროგრამა წარედგინება. დღის ბოლოს ქართული ხალხური სიმღერის საღამო გაიმართება, რომელშიც ანსამბლი "დიდგორი" მიიღებს მონაწილეობას.

13 ოქტომბერს ნაჩვენები იქნება ბადენ-ვიურტემბერგის კინოაკადემიის სტუდენტური ფილმები, ანესის ანიმაციური ფილმების საერთაშორისო ფესტივალის ნამუშევრები და საქართველოს ფრანგული ინსტიტუტის მიერ წარმოდგენილი ფრანგული პროგრამა. საღამოს გაიმართება ქართული საგალობლებისა და სიმღერის კონცერტი მალხაზ ერქვანიძისა და მგალობელთა გუნდის მონაწილეობით.

14 ოქტომბერი საბავშვო პროგრამას დაეთმობა. დაგეგმილია დრეზდენისა და ანესის ფესტივალების საბავშვო ფილმების ჩვენება, ასევე თბილისის სათამაშოებისა და თოჯინების მუზეუმის საგანმანათლებლო პროგრამა — "თოჯინების ისტორია".

15 ოქტომბერს მაყურებელი კიოლნის მედიახელოვნების აკადემიის სტუდენტურ ფილმებს, დრეზდენის ფესტივალის საუკეთესო ნამუშევრების შერჩევას და ანესის ფესტივალის საბავშვო პროგრამას ნახავს. დღის მეორე ნახევარში წარმოდგენილი იქნება უკრაინული თანამედროვე ანიმაციისა და მედია ხელოვნების ფესტივალის „ლინოლეუმის“ პროგრამა, საღამოს კი გაიმართება თამარ ჟვანიას საფორტეპიანო კონცერტი.

ფესტივალის დასკვნით დღეს, 16 ოქტომბერს, ნაჩვენები იქნება ევროპის ჰუმანიტარული უნივერსიტეტისა და ტოკიოს ხელოვნების უნივერსიტეტის სტუდენტური ფილმები, ასევე ქართული ანიმაციის პროგრამა, რომელსაც საქართველოს ანიმატორთა ასოციაცია „საქანიმა“ წარადგენს. ფესტივალი დაიხურება საგუნდო მუსიკის კონცერტით, რომელშიც გორის ვანო მურადელის სახელობის სამუსიკო სკოლის ბავშვთა გუნდი და გორის ქალთა კამერული გუნდი მიიღებენ მონაწილეობას.

ფესტივალის პროგრამა სრულად ნახეთ აქ.