სისხლის სამართლის საერთაშორისო სასამართლოს მთავარი პროკურორს, კარიმ ხანს, სექსუალური ხასიათის არასათანადო ქცევის შესახებ ბრალდებებთან დაკავშირებული დისციპლინური პროცესის დასრულების გამო, უფლებამოსილება შეუჩერეს. ამის შესახებ ინფორმაციას The Guardian ავრცელებს.

სასამართლოს მმართველმა ორგანომ გადაწყვეტილება ორშაბათს საღამოს მიიღო. ორგანიზაციის აღმასრულებელმა კომიტეტმა საქმე ICC-ის წევრი 125 სახელმწიფოს სპეციალურ სესიას გადასცა, სადაც კარიმ ხანის მომავალი განიხილება.

The Guardian-ის მიერ მოპოვებული დოკუმენტის თანახმად, სასამართლოს წევრი სახელმწიფოების 21-კაციანმა კომიტეტმა კვალიფიციური უმრავლესობით დაადგინა, რომ ხანმა სექსუალური ძალადობის ბრალდებებთან დაკავშირებით "სერიოზული გადაცდომა" ჩაიდინა.

კარიმ ხანი, რომელიც ცნობილი ბრიტანელი იურისტია, კატეგორიულად უარყოფს ყველა ბრალდებას. საქმე 2024 წელს გახდა საჯარო და მნიშვნელოვნად შეაფერხა მისი საქმიანობა სასამართლოს პროკურატურის ხელმძღვანელის პოზიციაზე. ბრალდებები ჰააგაში მდებარე ICC-ის შტაბ-ბინაში დასაქმებულმა ქალმა თანამშრომელმა წამოაყენა.

საქმის წევრ სახელმწიფოებთან გადაგზავნა სასამართლოს ისტორიაში უპრეცედენტო ნაბიჯად მიიჩნევა. პროცესის საბოლოო ეტაპზე შესაძლოა გაიმართოს კენჭისყრა, რომელიც განსაზღვრავს, დარჩება თუ არა ხანი თანამდებობაზე.

ICC-ის მმართველი ორგანოს განცხადებით, მისი დროებითი ჩამოშორება "არ მიუთითებს საქმის საბოლოო შედეგზე". ხანს მანამდეც ჰქონდა დროებით შეჩერებული სასამართლოს იმ განყოფილების ხელმძღვანელობა, რომელიც ომისა და სხვა მძიმე დანაშაულების საქმეებს იძიებს.

ორგანიზაციის ცნობით, გადაწყვეტილება გაეროს დამოუკიდებელი ზედამხედველობის ორგანოს ანგარიშის, სასამართლო ექსპერტთა პანელის რეკომენდაციებისა და მხარეთა წერილობითი პოზიციების საფუძველზე მიიღეს.

ბრალდებები ეხება 2023-2024 წლებში მომხდარ სავარაუდო ფაქტებს. ქალის განცხადებით, ხანი ხანგრძლივი პერიოდის განმავლობაში ახორციელებდა იძულებით სექსუალური ხასიათის ქმედებებს. მისი მტკიცებით, შემთხვევები სამუშაო მივლინებების დროს სასტუმროებში, ხანის ოფისსა და მის საცხოვრებელ სახლში ხდებოდა.

ხანის ადვოკატებმა აქამდე განაცხადეს, რომ ის "კატეგორიულად უარყოფს" რომელიმე პირის შევიწროებას ან არასათანადო მოპყრობას, თანამდებობის ან უფლებამოსილების ბოროტად გამოყენებას, ან რაიმე ქმედებაში მონაწილეობას, რომელიც შეიძლება განიმარტოს, როგორც იძულებითი, ექსპლუატაციური ან პროფესიულად შეუფერებელი.

ცნობისთვის, ჰააგის სისხლის სამართლის საერთაშორისო სასამართლოს (ICC) პროკურორი, ბრიტანელი კარიმ ხანი პირველი ადამიანია, ვინც დონალდ ტრამპმა ეკონომიკური და სამგზავრო სანქციებით დასაჯა სასამართლოს წინააღმდეგ დაწყებული გამოძიების ფარგლებში.