ეკონომიკური პოლიტიკის კომიტეტის თავმჯდომარემ, შოთა ბერეკაშვილმა, პარლამენტის ტრიბუნიდან განაცხადა, რომ ის ფასების შემსწავლელ კომისიას ხელმძღვანელობდა და არა "ფასების დაკლების კომისიას".

"ეს პირველ რიგში იყო არა ფასების დაკლების კომისია, ეს იყო ფასების შემსწავლელი კომისია," — განაცხადა ბერეკაშვილმა.

ბერეკაშვილის განცხადებით, ფასების შემსწავლელი დროებითი კომისიის მიზანი იმ პრობლემების იდენტიფიცირება იყო, რომლებიც საკვებ პროდუქტებზე ინფლაციას იწვევს. ბერეკაშვილის განცხადებით, კომისიის 108-გვერდიანი დასკვნა სწორედ ამ პრობლემის მოგვარებას ემსახურება.

"მე თავიდანვე აღვნიშნე, რომ მიზანი კომისიის იყო რომ პირველ რიგში იდენტიფიცირება გაგვეკეთებინა პრობლემებისთვის, თუ რა პრობლემები იწვევს საკვებ პროდუქტებზე ინფლაციას. შემდეგ გაგვეკეთებინა ანალიტიკა, შესწავლა სექტორის სიღრმისეული და სწორედ ამის შემდეგ დაგვედო გეგმა, რომლის საფუძველზეც შესაძლებელი იქნებოდა აღნიშნული პრობლემის მოგვარება. სწორედ ის 108-გვერდიანი დასკვნა შედგება ამისგან," — განაცხადა ბერეკაშვილმა.

გამოსავალზე საუბრისას ბერეკაშვილმა განაცხადა, რომ მათ სხვა ქვეყნების მაგალითებით იხელმძღვანელეს და საბერძნეთის მოდელით რეკომენდაციები გასცეს. მისი თქმით, მათ მიერ გაცემული რეკომენდაციის საფუძველზე, დისტრიბუტორთა ქსელებმა "საოჯახო კალათა" შექმნეს. მისი თქმით, სუპერმარკეტები "15 საბაზისო პროდუქტზე საუკეთესო ფასებს შესთავაზებენ მომხმარებელს".

"ჩვენი ბაზრის სტრუქტურა როდესაც შევისწავლეთ, ის ძალიან ჰგავს საბერძნეთისას და სწორედ ასეთი რეკომენდაციები გავეცით. მე ძალიან მოხარული ვარ და მადლობა მინდა ვუთხრა ქსელებს, ასევე დისტრიბუტორებს და მწარმოებლებს, რომლებმაც ბერძნული მოდელის ფარგლებში საოჯახო კალათა შექმნეს და ამის პირველი ნაბიჯები უკვე გადაიდგა. ისეთი 15 საბაზისო პროდუქტი, რომელიც ძალიან მნიშვნელოვანია ჩვენი მოსახლეობისთვის, მასზე საუკეთესო ფასებს შესთავაზებენ მომხმარებელს. ისეთ საუკეთესო ფასებს შესთავაზებენ, რომ მართლაც მე რომ შევამოწმე აღფრთოვანებული დავრჩი და თქვენც შეგიძლიათ მედიასაშუალებებით ნახოთ. ეს, როგორც არ უნდა ჩათვალოთ, ამ ეტაპზე ძალიან კარგი მიღწევაა," — განაცხადა ბერეკაშვილმა.