სებ-ის ყოფილი პრეზიდენტი რომან გოცირიძე პარლამენტის სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი დროებითი კომისიის დასკვნას ეხმაურება. მისი აზრით, ფასების ზრდის რეალური მიზეზი ფულის ბეჭდვაა, რასაც სამთავრობო "ფასების კომისია" შეგნებულად მალავს. გოცირიძე წერს, რომ კომისიამ ბიზნესი პასუხისმგებლობისგან გაათავისუფლა, ხოლო პრობლემის მოსაგვარებლად შემოთავაზებული სახელმწიფო სადისტრიბუციო ცენტრების იდეა მხოლოდ ვენესუელური დიქტატურის გადმონაშთია, რაც თავისუფალ ვაჭრობას დაანგრევს.

"ფასებს ზრდის ფულის ბეჭდვა. ამ იდეისათვის ნობელის პრემია მიიღო ხალხმა. თუ რატომ ხდება საჭირო ფულის ბეჭდვა, ამ მეორე იდეისათვის ნობელის პრემიები მიიღო სხვა ხალხმა.

ფასების კომისიამ ისე დაამთავრა მუშაობა, რომ ეროვნული ბანკის და მთავრობის როლი არც კი უხსენებია.

უსაქმურების მრავალთვიანი სხდომებიდან გავიგეთ ორი რამ:

— არაფერ შუაში ყოფილან სავაჭრო ქსელები (საწვავიც იგულისხმება), ტყუილად დავაბრალეთ ზედმეტი მოგების მიღება, სინამდვილეში "მიწოდების ჯაჭვში" დამატებითი ხარჯები წარმოიშობა და ეს ზრდის საქონლის თვითღირებულებასო (ფასსო);

— ეს პრობლემა რომ აღმოიფხვრას, მთავრობამ უნდა შექმნას რეგიონებში საქონლის მიწოდების სახელმწიფო სადისტრიბუციო ცენტრებიო.

ეს რეკომენდაცია პირდაპირ გადმოწერეს ვენესუელის ფასების კომისიიდან, რომელსაც დიქტატორი ჰუგო ჩავესი ხელმძღვანელობდა და რომელმაც მოშალა ქვეყანაში ვაჭრობა და ჰიპერინფლაცია წარმოშვა. ახლა ჰუგო ჩავესი საიქიოს დიდ საკონცერტო დარბაზში პირველ რიგში ზის კობზონის კონცერტზე, ხოლო მისი მემკვიდრე მადურო ამერიკის ციხეში.

ამ კომისიის სხდომების ორგანიზებისათვის რამდენი ელექტროენერგია, საწვავი და ხელფასები დაიხარჯა, რამდენი მილიონი დაუჯდა ბიუჯეტს ამათი ნაბჟუტურების იმედ-რუსთავზე გაშუქება-ყველა თეთრი უკან უნდა დააბრუნონ ბიუჯეტში.

მთავარი შედეგი კი ის მივიღეთ, რომ თავდაპირველად თუ ხელისუფლების ნაცვლად პასუხისმგებლობის გადაკისრება ბიზნესზე უნდოდათ (ნაწილობრივ სამართლიანად), ახლა ეს ბიზნესიც გაათავისუფლეს პასუხისმგებლობისგან, ბოდიში მოუხადეს "ფასნამატში" რომ სდებდნენ ბრალს და სრული კარტბლანში მისცეს ხალხის საძარცვავად.

არ იქნება სამართალი, არ იქნება იაფი კვერცხი, ამბობს თანამედროვე ქართული ანდაზა, რომელიც ქუჩაში იშვა," — წერს რომან გოცირიძე სოციალურ ქსელში.

პარლამენტის სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი დროებითმა კომისიამ აპრილის ბოლოს მუშაობა დაასრულა და დასკვნა წარადგინა. კომისიის თავმჯდომარის, შოთა ბერეკაშვილის განცხადებით, პროდუქციაზე ფასნამატი ბიზნესის გადაჭარბებული მოგებით არაა გამოწვეული, პრობლემა არაეფექტურ საოპერაციო ხარჯებშია.

"პრობლემა ბაზრის სტრუქტურულ მოწყობაშია — ძირითადი პრობლემაა არა გადაჭარბებულ მოგებაში, არამედ პრობლემა არის არაეფექტურ საოპერაციო ხარჯებში.

ეს არის ბაზრის ძირითადი პრობლემა, რაც განპირობებულია რამდენიმე მნიშვნელოვანი ფაქტორით.

პირველი, ეს არის ის, რომ არ არის სათანადო გამჭვირვალობა და კომერციული ურთიერთობები გაუგებარია. არის სხვადასხვა ტიპის კომერციული და მარკეტინგული გადასახადები, რომელიც არის გაუმჭვირვალე. ზოგ შემთხვევაში რიგი გადასახედები არის ისეთი, რომელიც კომერციულ ურთიერთობებს არ ექვემდებარება.

მეორე პრობლემა გადახდების მნიშვნელოვანი დაგვიანებაა. აქ თავს იჩენს პრობლემა, რომ ჯაჭვში დამატებით ხარჯებს და დამატებით ზეწოლას ქმნის. სუბიექტი, რაც უფრო ქვემოთ არის, ეს ზეწოლა უფრო ძლიერდება. ეს მნიშვნელოვან ზეწოლას ქმნის ქვედა რიგის მონაწილე კომპანიებისთვის. ამ სექტორში ერთ-ერთი მნიშვნელოვანი კომპონენტია გადახდების სტანდარტიზაცია, რათა ჯაჭვში თითოეულმა მონაწილემ ზუსტად იცოდეს როგორ არის გადახდების პროცესი. ამის დარეგულირება და ჩარჩოში მოქცევა ყველაზე მნიშვნელოვანი გამოწვევაა.

გამჭვირვალეობის ნაწილში მნიშვნელოვანი გამოწვევაა ნაშთების მართვა. ამ ნაწილში გამოიკვეთა ის, რომ ნაშთების ბრუნვის შესაძლებლობა არ არის სწორი და მცირე და საშუალო მწარმოებლებს თავიანთი ნაშთების ბრუნვაზე წვდომა არა აქვთ, რაც მათ საშუალებას არ აძლევს, რომ ბრუნვის პროცესი სწორად დაგეგმონ. ამიტომ აუცილებელია სექტორის გაციფრულება, რაც იმას ნიშნავს, რომ საოპერაციო მოდელი იქნება გამჭვირვალე, გასაგები და თითოეულ რგოლს ექნება წვდომა თავიანთი პროდუქტების მოძრაობაზე. ეს არის უაღრესად დიდი პრობლემა, რომელიც დამატებით ხარჯს ქმნის," — განაცხადა ბერეკაშვილმა.