ირაკლი კობახიძის თქმით, "სურსათზე ფასების გაძვირება ტყუილია" და ინფლაციური პროცესები შენელებულია.

"[სურსათის] გაძვირება ერთი რომ არის ტყუილი, იმიტომ, რომ პირიქით, შენელებულია ინფლაციური პროცესები. მაგრამ ჩვენ ამით არ ვკმაყოფილდებით. ჩვენი ამოცანაა, რომ ფასები შემცირდეს, რამდენადაც ეს არის შესაძლებელი. კომისია ამ კვირაში ამთავრებს მუშაობას. ჩვენ სამუშაო პროცესი მთავრობაში გვექნება მომავალ კვირაში და ამის შემდეგ უკვე საბოლოო გეგმით წარვდგებით საზოგადოების წინაშე," — განაცხადა კობახიძემ.

ჟურნალისტის კითხვაზე, ბოლოს როდის იმყოფებოდა სუპერმარკეტში და როდის შეამოწმა ფასები, კობახიძემ განაცხადა, რომ "ვებგვერდზე დევს ფასები და რა ფასებიც იყო ერთი თვის წინ, იგივე ფასებია შენარჩუნებული, განსაკუთრებით ძირითად პროდუქტებზე".

"მე წაგიყვანთ და საქონლის რბილ ხორცს და ღორის რბილ ხორცს გაყიდინებთ ნახევარ კილოგრამს 10 ლარში," — განაცხადა კობახიძემ.

ცნობისთვის, 23 აპრილს ირაკლი კობახიძემ განაცხადა, რომ "ფასებთან დაკავშირებით თვის ბოლომდე დასრულდება სამუშაო პროცესი, რის შემდეგაც საზოგადოებას გავაცნობთ ჩვენს დასკვნებს და შესაბამისად, გეგმას".