2 დეკემბერს ახალგაზრდა პოპვარსკვლავი საბრინა კარპენტერი თეთრ სახლს საჯაროდ დაუპირისპირდა, რადგან მათ საბრინას სიმღერა საიმიგრაციო ვიდეოს გასაფორმებლად გამოიყენეს.

ვიდეოში ჩანს, როგორ აპროტესტებს მოსახლეობა დონალდ ტრამპის საიმიგრაციო პოლიტიკას, შემდეგ კი ნაჩვენებია ფედერალური ორგანოების მიერ ადამიანების ძალადობრივი დაკავების კადრები. არ ვიცით, ეს დაკავებული ადამიანები არალეგალური იმიგრანტები არიან თუ არა — ვიდეოში მხოლოდ ის ჩანს, რომ ისინი ფერადკანიანები არიან.

"ეს ოდესმე გიცდიათ?" — საბრინას სიმღერის ტექსტი, რომელიც ვიდეოს სათაურშია გამოყენებული.

საბრინა პოსტს მეორე დღესვე გამოეხმაურა:

"ეს ვიდეო ბოროტული და ამაზრზენია. არასდროს გამომიყენოთ მე ან ჩემი მუსიკა თქვენი არაადამიანური პროპაგანდისთვის."

თუმცა თეთრმა სახლმა საბრინას მოთხოვნა არ გაითვალისწინა — მათ მომღერლის წინააღმდეგობას ისევ მისივე სიმღერებით უპასუხეს:

"ეს არის მოკლე და ტკბილი^{(საბრინას ალბომის სახელი)} გზავნილი საბრინა კარპენტერისთვის: ჩვენ ბოდიშს არ მოვიხდით ქვეყნიდან საშიში კრიმინალების, მკვლელების, მოძალადეებისა და პედოფილების დეპორტაციის გამო. ყველა, ვინც ამ ავადმყოფ მონსტრებს დაიცავს, ნამდვილად სულელია, ან, შეიძლება ითქვას, რომ ნელა აზროვნებს."_{(or is it slow?) — საბრინას სიმღერის ტექსტი}

საბრინა პირველი არ არის, რომელმაც თავისი სიმღერის უადგილოდ გამოყენება გააპროტესტა. ნოემბერში მომღერალმა და მსახიობმა ოლივია როდრიგომ იგივე გააკეთა, როცა მისი სიმღერა აშშ-ს უსაფრთხოების დეპარტამენტმა ანტი-იმიგრაციულ ვიდეოში გამოიყენა (ვიდეოდან სიმღერა უკვე წაშლილია):

საბრინასა და ოლივიას გარდა, თავიანთი მუსიკის გამოყენება გააპროტესტა MGMT-მ და Metallica-მ და სხვა მრავალმა არტისტმა.

ამ ყველაფრის ფონზე, იმ ერთი მუსიკოსის სიჩუმე, რომლის პასუხსაც ყველა ელოდება, ყველაზე ხმამაღლა ისმის. ტეილორ სვიფტი, მიუხედავად იმისა, რამდენ ადამიანს უყვარს და რამდენსაც — არა, დღეს მსოფლიოში ყველაზე ცნობილი არტისტია. შესაბამისად, ტრამპის ადმინისტრაციამ მსგავსი შინაარსის ვიდეოებში ტეილორის არა ერთი, არამედ უკვე რამდენიმე სიმღერა გამოიყენა, თუმცა სვიფტის პასუხი ამ ყველაფერზე არ ისმის.

ტეილორმა წარსულში არაერთხელ გამოხატა დონალდ ტრამპის მიმართ უარყოფითი დამოკიდებულება და განაცხადა, რომ პოლიტიკურ საკითხებზე აღარასდროს დარჩებოდა ჩუმად. თუმცა, ბოლო რამდენიმე წელია ამ პირობას არც ისე პირნათლად ასრულებს, რაც ფანების იმედგაცრუებას იწვევს. მისი მხარდამჭერები, ისევე, როგორც მისი კრიტიკოსები, სვამენ კითხვას: მართლა ადარდებდა ტეილორს პოლიტიკა, თუ მხოლოდ თავისი მუსიკის პოპულარიზაციისთვის იყენებდა?

აშშ-ს იმიგრაციისა და საბაჟო კონტროლის სამსახურმა (ICE) აგვისტოში "სამშობლოს დამცველების" პოზიციებზე ახალგაზრდა თაობის მისაზიდად ახალი სარეკლამო კამპანია წამოიწყო.