მოძრაობა სოციალური დემოკრატიისთვის განცხადებას აქვეყნებს, რომელშიც აღნიშნავს, რომ იუსტიცის სამინისტროს საჯარო რეესტრის ეროვნული სააგენტო ორგანიზაციას უარს ეუბნება დარეგისტრირებაზე. მოძრაობა სოციალური დემოკრატიისთვის მიიჩნევს, რომ მათი რეგისტრაცია პოლიტიკური ნიშნით, განზრახ ფერხდება.

"უკვე ორი კვირაა, იუსტიციის სამინისტროს საჯარო რეესტრის ეროვნული სააგენტო უარს გვეუბნება დარეგისტრირებაზე. მიგვაჩნია, რომ რეჟიმის მიმართ მოძრაობის კრიტიკული პოზიციებისა და საჯარო აქტივობების გამო, სამინისტრო პოლიტიკური მოტივებით განზრახ აფერხებს ჩვენს იურიდიულ პირად რეგისტრაციას.

საქართველოში დღესდღეობით სამართლიანობისთვის ბრძოლის იურიდიული გზები ეფექტიანი არ არის. მიუხედავად ამისა, ჩვენ დღეს, 11 მარტს, წამოვიწყეთ ამ უკანონობის გასაჩივრების პროცედურები და საჯარო რეესტრის ხელმძღვანელს მოვთხოვეთ სააგენტოს მიერ ჩვენთვის უმოქმედობით ნათქვამი უარის გაუქმება. ეს ორი მიზეზით გავაკეთეთ: პირველი, საჩივარი ჩვენი პოლიტიკური აქტია, განხილვის პროცესში გვინდა საზოგადოებას დავანახოთ უარის უსამართლობა, ამ ხერხით გავზარდოთ ზეწოლა რეჟიმზე და მივაღწიოთ რეგისტრაციას; ხოლო თუ ქვეყნის შიგნით სამართალს ვერ მივაღწევთ, საერთაშორისო დავის შემთხვევაში, საჭიროა გასაჩივრების ყველა შიდა პროცედურა ამოწურული გვქონდეს.

დამატებით მივმართეთ სახალხო დამცველსაც. მისგან მოვითხოვეთ, მოძრაობის რეგისტრაციაზე უარი შეაფასოს პოლიტიკური ნიშნით დისკრიმინაციად", — ვკითხულობთ განცხადებაში.