დღეს, საქართველოში "საერთაშორისო სავაჭრო პალატამ" (ICC) გაფიცვის გადაწყვეტილება მიიღო და ისინი 2024 წლის 5 დეკემბრამდე ოფისებს დახურავენ.

ამის შესახებ სპეციალური განცხადება გაავრცელა ICC-იმ, სადაც ვკითხულობთ, რომ ისინი გმობენ "ოცნების" მიერ ბოლო საპარლამენტო არჩევნების შემდეგ განხორციელებულ უკანონო ქმედებებს.

ამასთან, განცხადებაში აღნიშნულია, რომ ხელისუფლების მიერ არჩევნების უხეშმა გაყალბებამ, ქვეყნის ყველა ქალაქში გამოიწვია ფართო საპროტესტო გამოსვლები და ასობით ათასი მოქალაქე ქუჩებში პროტესტის გამოსახატად გავიდა.

"საერთაშორისო სავაჭრო პალატა" თვლის, რომ "ოცნებამ" საქართველოს ევროატლანტიკური ინტეგრაციის შეჩერებით საქართველოს კონსტიტუცია — კონკრეტულად 78-ზე მუხლი დაარღვია.

“ეს გადაწყვეტილება ძირს უთხრის იმ ერის მისწრაფებებს, რომელიც ცდილობს ევროპულ ღირებულებებსა და სტანდარტებთან შესაბამისობას.

დამოუკიდებელი და თავისუფალი ევროპული საქართველოს მსურველ ქართველთა აბსოლუტური უმრავლესობისადმი სოლიდარობით, ICC-Georgia მტკიცედ დგას ყოველი მშვიდობიანი მომიტინგეების გვერდით. ამ მოძრაობისადმი ჩვენი მხარდაჭერის დემონსტრირებისთვის და მათი ხმის გასამყარებლად, გადავწყვიტეთ სამი დღით გაფიცვა. ჩვენი ოფისები დაიკეტება 2024 წლის 5 დეკემბრამდე.

ჩვენ ყველა დაინტერესებულ მხარეს მოვუწოდებთ, პატივი სცენ ხალხის ნებას და დემოკრატიული პრინციპები დაიცვან.

საქართველოს მომავალი თავისუფლებისა და ევროპასთან ინტეგრაციის ვალდებულებაშია", — ნათქვამია განცხადებაში.