ცნობილი ამერიკელი მსახიობი დაკოტა ჯონსონი, რომელმაც განსაკუთრებული პოპულარობა 50 ელფერის ტრილოგიაში მონაწილეობით მოიპოვა, ფილმებზე მუშაობის პროცესსა და ამ დროს შექმნილ უთანხმოებებს იხსენებს. ჯონსონი გადაღებებს "ბრძოლას" უწოდებს და ხსნის, რა წინააღმდეგობები შეხვდა ფილმებზე მომუშავე ჯგუფთან.

გამოცემა Vanity Fair-ისთვის მიცემულ ინტერვიუში ჯონსონმა განაცხადა, რომ საკუთარ თავს "სექსუალური ინტერესი მქონე პიროვნებად" მიიჩნევს და სწორედ ამიტომ დაინტერესდა ფილმებში მონაწილეობით — უნდოდა, 50 ელფერის წიგნების ავტორის, ე.ლ. ჯეიმსის, აღწერილ სექსუალური გამოცდილებაზე მეტი შეეტყო.

თუმცა, დაკოტას თქმით, იგი ფილმის "სულ სხვა ვერსიის" გადაღებას დათანხმდა — იმისგან განსხვავებულის, რაც ეკრანზე ვიხილეთ. მსახიობის თქმით, პრობლემას კინოსტუდიასთან, რეჟისორებთან და წიგნების ავტორთან მუშაობა ქმნიდა.

"ერიკა (მწერალი) შემოქმედებით პროცესში ბევრ რამეს აკონტროლებდა, მთელი დღე, ყოველდღე", — იხსენებს ჯონსონი, — "ითხოვდა, რომ კონკრეტული რაღაცები ფილმში ყოფილიყო. არადა, წიგნში იყო ადგილები, რომელთა ეკრანზე გადატანა ვერაფრით მოხერხდებოდა — მაგალითად, შინაგანი მონოლოგი, რომელიც ადგილ-ადგილ საშინლად ჩანდა. მთელი ეს ხანი ბრძოლა იყო".

აღსანიშნავია, რომ როცა ფილმში ანასტასია სტილის როლზე დაკოტა დაამტკიცეს, ქრისტიან გრეის როლი ჩარლი ჰანემს უნდა შეესრულებინა. მოგვიანებით, ჰანემმა პროექტი დატოვა და ამის მიზეზად სცენარი დაასახელა. ჯონსონის თქმით, მწერალი ამაზე ისე გაჯავრდა, რომ სცენარი მოისროლა. შემდეგ კი, გრეის როლზე უკვე ჯეიმი დორნანი დამტკიცდა.

"პატარა ვიყავი, სულ რაღაც 23 წლის და ეს საშიში ჩანდა. ბევრი უთანხმოება იყო", — იხსენებს დაკოტა, — "ამაზე გულწრფელად საუბრის შანსი არასდროს მომცემია, რადგან მინდოდა, ფილმის პოპულარიზება სწორი კუთხით მომეხდინა. ამასთან, ვამაყობ იმით, რაც საბოლოოდ შევქმენით და ყველაფერი ისე გამოვიდა, როგორც უნდა გამოსულიყო. თუმცა, ეს რთული იყო".

მსახიობი იმასაც ამბობს, რომ ფილმის შექმნის პროცესში სხვადასხვა სცენის რამდენიმე ვარიანტს იღებდნენ — რაც წიგნების ავტორს სურდა და რაც მათ უნდოდათ.

გამოწვევების მიუხედავად, ჯონსონი აღნიშნავს, რომ პროექტში ჩართვას არ ნანობს. ამასთან, ამატებს, რომ ფილმებზე კიდევ ბევრ რამეს არ ამბობს, რადგან არ უნდა, ვინმეს კარიერა ან რეპუტაცია დააზიანოს.

"მეც და ჯეიმისაც კარგად გვექცეოდნენ. ერიკა ძალიან სასიამოვნო ქალია, ჩემ მიმართ ყოველთვის კეთილგანწყობილი იყო და მადლობელი ვარ, ფილმებში ჩემი ჩართვა რომ მოისურვა", — დასძენს დაკოტა.

ბრიტანელი მწერლის, ე.ლ. ჯეიმსის ბესტსელერი ტრილოგია დღემდე მიიჩნევა ერთ-ერთ ყველაზე პოპულარულ წიგნების სერიად მსოფლიოში. ტრილოგიის პირველი ნაწილი ბრიტანეთში ყველა დროის ყველაზე სწრაფად გაყიდვადი რბილყდიანი გამოცემა გახდა. ჯამში, გრეის ორმოცდაათი ელფერი 52 ენაზე ითარგმნა და 150 მილიონზე მეტ ეგზემპლარად გაიყიდა. წიგნების მიხედვით გადაიღეს ბლოკბასტერების სერიაც, რომელმაც $1,3 მილიარდი გამოიმუშავა.