გერმანია აპირებს გადაუდებელი ზომები მიიღოს, რათა იმ შემთხვევაში, თუ რუსეთი გაზის მიწოდებას შეწყვეტს, ენერგომომარაგება გარანტირებული იყოს. ამის შესახებ ინფორმაციას BBC ავრცელებს.

რატომ არის მნიშვნელოვანი: ეს ნაბიჯი მოჰყვა გასულ კვირას გაზპრომის გაფრთხილებას, რომ ევროპაში გაზის მიწოდებას მკვეთრად შეამცირებს, გერმანიაში კი გაანახევრებს.

  • ევროპის ქვეყნები რუსულ გაზზე დამოკიდებულების შემცირებას თავადაც გეგმავენ, თუმცა ამბობენ, რომ მომავალ წლამდე ეს 2/3-ით მოხდება.
  • ეს პირველი შემთხვევა არ არის, როცა ამ საკითხის გამოყენებით კრემლმა პროვოკაცია სცადა. მან 27 აპრილს ბუნებრივი აირის მიწოდება შეუწყვიტა პოლონეთსა და ბულგარეთს.

გერმანია ამბობს, რომ გაზის მოხმარების შესამცირებლად ელექტროენერგიის გამომუშავებისთვის ნაკლები გაზი უნდა გამოიყენონ.

  • "უფრო მეტად უნდა გამოვიყენოთ ნახშირზე მომუშავე ელექტროსადგურები", — განაცხადა გერმანიის ეკონომიკის მინისტრმა.
  • "ეს მწარე იქნება, მაგრამ მოხმარების შესამცირებლად შეუცვლელია".

არქივიდან: რუსეთმა "არამეგობრული" ქვეყნებისგან ენერგორესურსების საფასურის რუბლში გადახდა მოითხოვა — უარის გამო კი, ფინეთს, ბულგარეთსა და პოლონეთს გაზის მიწოდება შეუწყვიტა.

  • საპასუხოდ პოლონეთი და ბულგარეთი სამართლებრივ ნაბიჯებს განიხილავენ.
  • გერმანიამ თხევადი ბუნებრივი აირის (LNG) პირველი მცურავი ტერმინალის სამშენებლო სამუშაოები დაიწყო.
  • ევროკავშირმა უკვე მიიღო სანქციების მე-6 პაკეტი, რომელიც რუსულ ნავთობს ნაწილობრივ შეეხო.