კანდიდატის სტატუსის შესახებ სამი ქვეყნისთვის ისტორიული გადაწყვეტილების მიღების წინ, გერმანიის კანცლერმა, ოლაფ შოლცმა ასოცირებული ტრიოს მხოლოდ ორ წევრზე ისაუბრა.

რატომ არის მნიშვნელოვანი: ბოლოდროინდელმა მოვლენებმა აქტუალური გახადა იმაზე საუბარი, რომ ასოცირებულ ტრიოს ქვეყნებს შორის, საქართველოს სტატუსის მიღების ყველაზე ნაკლები შანსი აქვს.

  • მოსაზრებას არ ეთანხმებიან საქართველოს მთავრობაში და ამბობენ, რომ ჯერ საქართველო, შემდეგ უკრაინა და მოლდოვა იმსახურებენ სტატუსს.

შოლცის თქმით, ევროკავშირის გაფართოება ექვემდებარება მკაფიო კრიტერიუმებს, რომლებსაც უნდა აკმაყოფილებდეს ყველა კანდიდატი. ამის შესახებ კიევში 4 ქვეყნის ლიდერთან ერთად გამართულ ბრიფინგზე ისაუბრა.

  • "გერმანია უკრაინის სასარგებლოდ დადებითი გადაწყვეტილების მომხრეა. ეს ასევე ეხება მოლდოვის რესპუბლიკასაც".
  • კანცლერი ასევე ამბობს, რომ გერმანია გააგრძელებს უკრაინის მხარდაჭერას მანამ, სანამ ეს დასჭირდება.
  • "უკრაინა ევროპულ ოჯახს ეკუთვნის".

აქამდე, საფრანგეთის პრეზიდენტმა, ემანუელ მაკრონმა უკრაინა-მოლდოვასთვის "მკაფიო და პოზიტიურ" სიგნალებზე ისაუბრა.

  • რაც შეეხება საქართველოს, საფრანგეთის პრეზიდენტი აცხადებს, რომ ქვეყანა "გეოპოლიტიკურად განსხვავებულ ადგილზეა".

არქივიდან: ევროკავშირმა მალე სამი ქვეყნისთვის კანდიდატის სტატუსის მინიჭებაზე უნდა იმსჯელოს, თუმცა რამდენიმე დღეა, საქართველოს მიმართ კითხვის ნიშნები დაისვა.

  • 9 ივნისს იყო ევროპარლამენტის კრიტიკული რეზოლუცია, სადაც მედიაგარემოსა და მთავრობის დამოკიდებულებაზე ევროპარლამენტარებმა შეშფოთება გამოხატეს;
  • იმავე დღეს ევროპარლამენტის პოლიტიკურმა ჯგუფებმა განცხადება გაავრცელეს, სადაც ევროკავშირს ორი ქვეყნისთვის სტატუსის მინიჭებისკენ, ხოლო საქართველოზე მუშაობისკენ მოუწოდებენ.
  • ამას საერთაშორისო მედიებში წყაროებზე დაყრდნობით გავრცელებული ინფორმაციები მოყვა, სადაც საქართველოს შესახებ განსხვავებული მოსაზრებები იკვეთება.