მეცნიერების, განათლებისა და კულტურის პროფესიული კავშირის განცხადებით, 2022 წლის პირველ აპრილს საქართველოს ეროვნულ მუზეუმში გაუმჭვირვალე რეორგანიზაციის ფარგლებში შიდა უსაფრთხოების დეპარტამენტი გაუქმდა და ფუნქცია მონიტორინგის დეპარტამენტმა შეითავსა.

რატომ არის მნიშვნელოვანი: ეროვნული მუზეუმიდან ე.წ რეორგანიზაციის ფარგლებში 10-ობით თანამშრომელი გაათავისუფლეს.

  • პროფკავშირების განცხადებით, რეორგანიზაცია გაუმჭირვალედ და არაკეთილსინდისიერად ტარდება.
  • სფეროში მოღვაზე ადამიანთა ნაწილი აცხადებს, რომ კულტურის მინისტრის, თეა წულუკიანის პოლიტიკა რეპრესიულია.

რას ამბობენ პროფკავშირებში: 9 ივნისს პროფესიული კავშირის წევრები დამსაქმებელთან კოლექტიური დავის წამოწყების და საქართველოს ეროვნული მუზეუმის კანცელარიაში განცხადების შეტანის მიზნით მუზეუმის წინ შეიკრიბნენ.

  • მათი განცხადებით, 14 ივნისს ახლადშექმნილმა მონიტორინგის სამსახურმა შეკრებილი თანამშრომლების დაბარება და შეკრებასთან დაკავშირებით ახსნა-განმარტების დაწერა მოთხოვა.
  • პროფკავშირები ეროვნული მუზეუმის ადმინისტრაციას მოუწოდებენ, შეწყვიტოს თანამშრომლების დაშინება და ფსიქოლოგიური ზეწოლა.

მოთხოვნები: 9 ივნისის შეხვედრაზე შეკრებილებმა მოითხოვეს, ეროვნული მუზეუმის თანამშრომელთა მიერ სამეცნიერო პროექტების და საქმიანობის მართვის, ასევე გამოფენებისა და საგამოფენო სივრცეებში, ცვლილებების შეტანის წესები შემუშავდეს შესაბამის საბჭოებთან კურატორებთან და პროფესიული კავშირის წარმომადგენლებთან ერთად.

  • რეორგანიზაციის ფარგლებში გათავისუფლებული ყველა თანამშრომელი აღდგეს პირვანდელ ან ტოლფას პოზიციებზე და გაერთიანებული სამეცნიერო საბჭოს დაკომპლექტების წესი მოვიდეს შესაბამისობაში კანონმდებლობასთან;
  • მუზეუმის ყველა თანამშრომელს ხელფასი გაეზარდოს 100%-ით, პროფესიულ კავშირთან გაფორმდეს შრომის კოლექტიური ხელშეკრულება, დასაქმებულებს მიეწოდოთ რეორგანიზაციის შესახებ სრული ინფორმაცია;
  • მოთხოვნები სრულად ნახეთ აქ.

კონტექსტი: ეროვნული მუზეუმი ერთადერთი სახელოვნებო სივრცე არ არის, სადაც კულტურაში რეპრესიულ პოლიტიკაზე საუბრობენ.

  • კინოაკადემიამ სალომე ჯაშის დოკუმენტური ფილმის მოთვინიერების სეანსები გააუქმა. კინოაკადემიის ხელმძღვანელმა, მინდია ესაძემ რადიო თავისუფლებასთან თქვა, რომ კინოჩვენებების გაუქმების მიზეზი ფილმის შინაარსია.
  • თბილისის წიგნის საერთაშორისო ფესტივალის ორგანიზატორის, გვანცა ჯობავას განცხადებით, წელს პირველად, დაახლოებით 12-წლიანი თანამშრომლობის შემდეგ, კულტურის სამინისტრო ფესტივალის მხარდამჭერი აღარაა.
  • წულუკიანის პოლიტიკის გამო გაუქმდა პრემია ლიტერა და მის მაგივრად "თავისუფალი ლიტერა" შეიქმნა.