პრეზიდენტის საგანგებო ბრიფინგის მეორე დღეს ქართულმა ოცნებამ საპასუხო გამართა. ირაკლი კობახიძემ 12-წუთიანი განცხადება და კითხვების დრო კრიტიკას მიუძღვნა — თქვა, რომ სალომე ზურაბიშვილის განცხადებებზე გამოხმაურებას საჭიროდ არ ჩავთვლიდნენ, თუმცა, პატივს სცემენ კონსტიტუციურ სტატუსს.

რატომ არის მნიშვნელოვანი: მას შემდეგ, რაც პრეზიდენტმა მმართველი გუნდის ქმედებების კრიტიკა დაიწყო, ქართული ოცნება ვალში არ დარჩა. საგულისხმოა ისიც, რომ ყველას, ვინც ხელისუფლებას აკრიტიკებს, "რადიკალურ ოპოზიციასთან" კავშირი ბრალდება.

• გაჩნდა ინტერესი, იმავე პასუხს მიიღებდა თუ არა მათივე მხარდაჭერილი საპრეზიდენტო კანდიდატი. ასეც მოხდა.

როგორ დააკავშირა ზურაბიშვილი ოპოზიციასთან: კობახიძემ პრეზიდენტის განცხადებების ნაწილს "ოპოზიციის ანტისახელმწიფოებრივი რიტორიკის გაგრძელება", ნაწილს კი "ადეკვატურობას მოკლებული" უწოდა. კიდევ რამდენიმე ციტატა:

• "გამოიყენა ნაციონალური მოძრაობისა და მისი სატელიტების კიდევ ერთი მესიჯბოქსი".
• "გაიმეორა იგივე, რასაც აკეთებენ ჩვენი ოპონენტები რადიკალური ოპოზიციიდან".
• "ეს იყო რადიკალური ოპოზიციის ინტერესი და რატომ იზიარებს ამ ინტერესს სალომე ზურაბიშვილი, ჩვენთვის გაუგებარია".
• "რატომ ჩაჯდა რადიკალური ოპოზიციის მესიჯბოქსში, ამის განსჯას საზოგადოებას მივანდობთ".

რა თქვა 16 ივნისზე: კობახიძემ განაცხადა, რომ ზურაბიშვილის შეკრებას არ შეუერთდებიან, რადგან ჰგონიათ, რომ მოუმზადებელი აქციაზე იქნება ხარვეზები და დააკნინებს ევროინტეგრაციის მიმართ ხალხის მხარდაჭერის მასშტაბებს.

• "ასეთ დროს, ბუნებრივია, ჩვენ მოუმზადებელ აქციას უნდა გავემიჯნოთ".

ანტიევროპულ რიტორიკაზე: კობახიძეს უკვირს, რატომ უწოდებს მმართველი გუნდის განცხადებებს პრეზიდენტი ანტიევროპულს, როდესაც ევროპარლამენტის რეზოლუცია თავადაც გააკრიტიკა.

• "ევროპარლამენტარების ის ნაწილი, რომელიც სააკაშვილისა და გვარამიას განთავისუფლებასა და ბიძინა ივანიშვილის სანქცირებას ითხოვს არაა ევროპა და აქამდე გვეგონა, რომ ანტიევროპულ რიტორიკად მათი კრიტიკის გამოცხადება მხოლოდ ნაციონალურ მოძრაობას შეეძლო".

კანდიდატის სტატუსზე: კობახიძის თქმით, ზურაბიშვილის ბრიფინგი პირდაპირ იყო მიმართული სტატუსის მიღების წინააღმდეგ. მანვე თქვა, რომ პრეზიდენტის "ე.წ. შეფასება ტყუილია".

• "როდესაც სალომე ზურაბიშვილი კანდიდატის სტატუსის შესახებ გადაწყვეტილების მიღებამდე ერთი კვირით ადრე აცხადებს, რომ შარშან ივლისში საქართველო იყო პირველ ადგილზე, ახლა კი არის ბოლო ადგილზე უკრაინასთან და მოლდოვასთან მიმართებით, ამ განცხადებას მხოლოდ უმძიმესი შეფასება შეიძლება მიეცეს".

ივანიშვილზე: კობახიძემ ზურაბიშვილს მხოლოდ ივანიშვილზე გაკეთებული განცხადება "შეუქო" და ჩათვალა, რომ პრეზიდენტმა უკან დაიხია.

• "არა გვგონია, რომ სალომე ზურაბიშვილმა საკუთარი განცხადება მისი სამარცხვინო შინაარსის დაგვიანებით გაცნობიერების გამო გადააკეთა. როგორც ჩანს, მან ნახა რა საზოგადოების განწყობა და უმძიმესი რეაქციები, მიხვდა, რომ ამ განცხადების უკიდურესი უსამართლობა და უმადურობა მის იმიჯს მძიმედ დააზიანებდა".

მეორე ფრონტზე: კობახიძემ ისევ გაიმეორა, რომ ზურაბიშვილს რეალური ძალაუფლება არ აქვს და აღნიშნა, რომ მას არავინ ეტყოდა იმაზე, სურს თუ არა საქართველოში მეორე ფრონტის გახსნა.

• "რადგან საქართველოს კონსტიტუციის მიხედვით, პრეზიდენტს მეორე ფრონტის გახსნის არავითარი ბერკეტი არა აქვს, საბედნიეროდ".

დემოკრატიულ უკუსვლაზე: კობახიძე აცხადებს, რომ ზურაბიშვილმა ვერ წარმოადგინა ვერცერთი არგუმენტი დემოკრატიული უკუსვლის შესახებ "ნაციონალური მოძრაობისა და მისი სატელიტების მესიჯის გასამყარებლად".

• მან პუნქტებად განიხილა ზურაბიშვილის მაგალითები სასამართლოზე, გვარამიას საქმესა და 5 ივლისზე და თქვა, რომ დემოკრატიული უკუსვლა არის ე.წ. აღქმა, რომლის უკანაც არავითარი ფაქტი არ დგას.