სახალხო დამცველი ნინო ლომჯარია თსუ-ის სტუდენტებს შეხვდა. მისი შეფასებით, ბაგების საერთო საცხოვრებელში არსებული მდგომარეობა საფრთხის შემცველი და ღირსების შემლახავია.

ომბუდსმენი ამბობს, რომ წარმოუდგენელია 21-ე საუკუნეში სტუდენტებს სთავაზობდნენ ამგვარ ფართს.

  • მისივე თქმით, ლისის საერთო საცხოვრებელში პირობები ნორმალურია, თუმცა თავისუფალი ადგილები შეზღუდულია.

რატომ არის მნიშვნელოვანი: ბაგების საერთო საცხოვრებელში წლებია პრობლემებია, შენობაში გაყვანილობა გაუმართავია, ექსპერტიზამ დაადგინა, რომ სერიოზულ სარემონტო სამუშაოებს საჭიროებს.

  • უკვე რამდენიმე კვირაა თსუ-ის სტუდენტები გამოცდების დასწრებად რეჟიმში დანიშვნას აპროტესტებენ და დისტანციურს ითხოვენ, რადგან თბილისში მცირე დროით ბინის დაქირავების პრობლემა აქვთ.
  • უნივერსიტეტი ამას არ თანხმდება და სტუდენტებს საერთო საცხოვრებლებს, ასევე ქუთაისსა და ახალციხეში ჩაბარებას სთავაზობს.

დეტალები: სტუდენტების პროტესტი თავიდან დისტანციური სწავლების შენარჩუნების მოთხოვნით დაიწყო, რასაც უნივერსიტეტი მხოლოდ ნაწილობრივ დათანხმდა — წესი არ გავრცელდა გამოცდებზე. აქციები გაგრძელდა, სტუდენტებმა რექტორის კაბინეტი დაიკავეს. ახლა მათ 4 მოთხოვნა აქვთ:

  • საერთო საცხოვრებლის მშენებლობა;
  • ფინანსური გამჭვირვალობა;
  • მიმდინარე სემესტრის ფინალურ გამოცდათა ფორმატის ცვლილება;
  • რექტორის გადადგომა და არჩევის წესის ცვლილება.

თსუ-ის ადმინისტრაცია მოუწოდებს სტუდენტებს, დატოვონ რექტორატი და გადავიდნენ მოლაპარაკების ფორმატზე.

  • "სტუდენტთა ცოდნის ობიექტური შეფასებისა და თანასწორი პირობების უზრუნველსაყოფად გამოცდები ჩატარდება აუდიტორიებსა და საგამოცდო ცენტრებში" — აცხადებენ ისინი.