საქართველოს ბანკი აგრომიმართულების გაძლიერებას განაგრძობს. ბანკთან პარტნიორობით, ოზურგეთში, ექადიას ტერიტორიაზე, 2 ჰექტარზე ზე მოცვის პლანტაცია გაშენდა. პროექტის ჯამური მოცულობა 140 000 ლარია, ბანკის თანამონაწილეობა კი 90 000 ლარს შეადგენს.

"ჩვენი მოცვის პლანტაცია ნაწილობრივ სტარტაპია, რომლის ჩამოყალიბებაშიც ჩვენი პარტნიორი, საქართველოს ბანკი დაგვეხმარა. ამ ეტაპზე, 2 ჰა-ტერიტორიაზე, სადაც მოცვი გავაშენეთ, საწყის ეტაპზე 6 ტონა მოსავალს ველით, 4 წლის შემდეგ კი, გვაქვს მოლოდინი, რომ ის 15 ტონამდე გაიზრდება. დამატებით ვფლობთ 2 ჰა მოცულობის აუთვისებელ მიწას და გვინდა, მომავალში ეს ტერიტორიაც მოცვის პლანტაციისთვის გამოვიყენოთ", — ამბობს მცირე მეწარმე, ირაკლი კარსანიძე.

"კენკროვანი კულტურები, კერძოდ კი მოცვი, ბოლო პერიოდში საკმაოდ პოპულარული გახდა. იგი აქტიურად გადის ექსპორტზე. ექსპორტის წილი წლიდან წლამდე იზრდება, რაც ქართველ ფერმერებს აძლევს შესაძლებლობას, აწარმოონ და ქვეყნის ფარგლებს გარეთ რეალიზაციისთვისაც გაიტანონ მოცვი, ამით კი კიდევ უფრო მეტად განავითარონ ბიზნესი. მიგვაჩნია, რომ ასეთი წამოწყებების მხარდაჭერით ჩვენც შეგვაქვს ჩვენი მოკრძალებული წვლილი რეგიონისა და ქვეყნის ეკონომიკის განვითარებაში, ბიზნესის გაძლიერებასა და ახალი სამუშაო ადგილების შექმნაში", — განაცხადა გიორგი ბოჩიკაშვილმა, საქართველოს ბანკის მიკრო ბიზნესის დეპარტამენტის ბიზნესის განვითარების სამსახურის უფროსმა.