საქართველოს ბანკი, კორპორაციული სოციალური პასუხისმგებლობის ფარგლებში, იდეათეკების პროექტის განხორციელებას აქტიურ რეჟიმში განაგრძობს.

ბანკისა და მისი პარტნიორი კომპანიის, ნაბეღლავის, ასევე, ქართული წიგნის ინსტიტუტის მხარდაჭერით, ჩოხატაურის მუნიციპალიტეტის სოფელ ნაბეღლავის საჯარო სკოლაში იდეათეკა გაიხსნა. ამიერიდან, მოსწავლეები შეძლებენ ისარგებლონ იდეათეკაში განთავსებული, ფორმალური და არაფორმალური განათლებისთვის საჭირო 900-მდე დასახელების წიგნით, სპეციალურად მოსწავლეებისთვის შერჩეული თანამედროვე ლიტერატურით, ინტერნეტით, პროექტორით, კომპიუტერებით და ა.შ.

"დღეს კიდევ ერთი იდეათეკა გავხსენით და ვხვდები, რომ წარმატებით ვახორციელებთ იმ მიზანს, რომელიც პროექტის დასაწყისში დავისახეთ. ჩვენი მიზანი იყო, ხელი შეგვეწყო რეგიონების საჯარო სკოლებისთვის, მოსწავლეებისთვის ყველა ის საჭირო საგანმანათლებლო რესურსი უზრუნველეყოთ, რაც მათი განვითარებისთვის, პოტენციალის მაქსიმალურად ათვისებისთვისაა აუცილებელი. სასიამოვნოა იმის გააზრება რომ უკვე 7 რეგიონის 11 სკოლაში მოსწავლეებს აქვთ სივრცე, სადაც შეძლებენ იკითხონ, ისწავლონ, განვითარდნენ, ერთმანეთს გაუზიარონ საკუთარი ცოდნა. პედაგოგებს კი აქვთ შესაძლებლობა, საგაკვეთილო პროცესი ახალგაზრდებისთვის კიდევ უფრო საინტერესო გახადონ. აღსანიშნავია, რომ გურიის რეგიონში ეს უკვე მესამე იდეათეკაა, რომელიც, მჯერა, რომ რეგიონში საინტერესო ღონისძიებების ჩატარების ადგილად იქცევა და მოხარული ვართ, რომ ამ ყველაფერში ჩვენი მოკრძალებული წვლილი შევიტანეთ", — განაცხადა საქართველოს ბანკის გენერალურმა დირექტორმა, არჩილ გაჩეჩილაძემ.

კორპორაციული სოციალური პასუხისმგებლობის ფარგლებში იდეათეკების პროექტი უკვე მესამე წელია ხორციელდება. ამ დროის განმავლობაში 6 000-ზე მეტ მოსწავლეს მიენიჭა წვდომა თვითგანვითარებისთვის საჭირო ისეთ რესურსებზე, როგორებიცაა: ინტერნეტი, კომპიუტერი, პროექტორი, მრავალფეროვანი ბიბლიოთეკა თუ სხვა შემეცნებითი ხელსაწყოები.

ამ ეტაპზე, იდეათეკები გახსნილია: გორის მუნიციპალიტეტის სასაზღვრო სოფლებში — დიცში, ხურვალეთში, ზემო ნიქოზში; სოფელ დუისში, თეოფანე დავითაიას სახელობის ქალაქ ფოთის №1 საჯარო სკოლაში, თბილისის №146, ამბროლაურის №1 და ოზურგეთის მ№4 საჯარო სკოლებში, ახალქალაქის №3 სკოლაში, ჩოხატაურის №1 საჯარო სკოლაში და უკვე სოფელ ნაბეღლავის საჯარო სკოლაშიც.