ქართული ოცნების თავმჯდომარის, ირაკლი კობახიძის განცხადებით, დეპუტატ დიმიტრი ხუნდაძის კომენტარი არის რეაქცია "უსამართლობაზე, რომელიც ევროპარლამენტის რეზოლუციაში ვიხილეთ". ამის შესახებ მან იმედის ეთერში ისაუბრა.

"რაც განაცხადა ჩვენმა კოლეგამ, ბატონმა დიტო ხუნდაძემ არის რეაქცია იმ უსამართლობაზე, რომელიც ჩვენ ვიხილეთ ევროპარლამენტის რეზოლუციაში. ამას, მე შეგახსენებთ, წინ უსწრებდა ოპოზიციის წარმომადგენლების განცხადებები, მაგალითად, სალომე სამადაშვილი ამბობდა, ასეთ ძალიან საინტერესო და ნიშანდობლივ რამეს. ის ამბობდა, რომ კანდიდატობის მინიჭება უკეთესი არის ჩვენთვისო, საქართველოსთვის, გამომდინარე იქიდან, რომ ისეთი ვალდებულებები ჩაიდება, რომ ხელისუფლებას მოუწევს ხელისუფლებიდან წასვლაო.

რას ნიშნავს? ევროკავშირი დებს ისეთ ვალდებულებებს, რომელიც აიძულებს ხელისუფლებას წავიდეს, შესაბამისად ესაა სამადაშვილის მოლოდინი. ძალიან გაუგებარია და ასეთ განცხადებებზე, რა თქმა უნდა, ჩვენს კოლეგებს აქვთ ბუნებრივია, რეაქცია და ეს იყო მათ შორის, დიტო ხუნდაძის რეაქცია", — თქვა მან.

ქართული ოცნების დეპუტატმა, დიმიტრი ხუნდაძემ თქვა, რომ თუ საქართველო სტატუსს უსამართლო ვალდებულებებით მიიღებს, ქვეყანამ მასზე უარი უნდა თქვას. მისი თქმით, "სტატუსის მისაღებად ღირსებას ვერ დავთმობთ".

არასამთავრობო ორგანიზაციების განცხადებით, ევროინტეგრაციის პროცესთან დაკავშირებით ქართული ოცნების ხელისუფლების დამოკიდებულება არაკონსტიტუციურია. მათი თქმით, ხელისუფლების განცხადებები არამხოლოდ აზარალებს ქვეყნის ევროინტეგრაციის პროცესს და ეწინააღმდეგება საქართველოს კონსტიტუციას, არამედ სერიოზული საფრთხის ქვეშ აყენებს საქართველოს მოსახლეობის აბსოლუტური უმრავლესობის გაცხადებულ ევროპულ არჩევანს.

ევროპარლამენტმა საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ რეზოლუცია მიიღო, რომელსაც მხარი 308 დეპუტატმა დაუჭირა. წინააღმდეგი 218 იყო.

8 ივნისს ევროპარლამენტში ამ საკითხზე დებატები გაიმართა. ევროპარლამენტარებმა საქართველოში მედიაგარემო კრიტიკულად შეაფასეს და შეშფოთება გამოხატეს მთავრობის დამოკიდებულებებზე, რაც რეზოლუციაში დაწვრილებით აისახა.

ევროპარლამენტის პოლიტიკური ჯგუფების განცხადებაში კი ევროკავშირის წევრობის კანდიდატის სტატუსზეა საუბარი, საქართველო მოლდოვასა და უკრაინისგან გამიჯნულად არის ნახსენები და აღნიშნულია, რომ ევროკავშირმა საქართველოსთვის იმავე სტატუსის მინიჭებაზე უნდა იმუშავოს.