სპეციალურმა საგამოძიებო სამსახურის განცხადებით, დიპლომატიური კორპუსის წარმომადგენლების პერსონალური მონაცემების ხელმისაწვდომობის საქმეზე გამოძიება დაიწყო.

"გამოძიების დაწყებას საფუძვლად დაედო მედიასაშუალებით გავრცელებული ინფორმაცია, კერძოდ ტელეკომპანია მთავარი არხის ეთერში გასული სიუჟეტი, რომლის თანახმადაც, ერთ-ერთი კომპანიის ბუღალტერმა, საბუღალტრო ოფისის მიღმა ტერიტორიაზე — შენობის სადარბაზოში განათავსა საბუღალტრო დოკუმენტაცია, რომელიც დაკავშირებული იყო დიპლომატიური კორპუსის წარმომადგენლების მიერ სხვადასხვა სახის პროდუქციის შეძენასთან და შეიცავდა პერსონალურ მონაცემებს", — ნათქვამია განცხადებაში.

სამსახურმა გამოძიება სისხლის სამართლის კოდექსის 157-ე მუხლის პირველი ნაწილით, პერსონალური მონაცემების უკანონოდ მოპოვების, შენახვის, გამოყენების, გავრცელებისა და ხელმისაწვდომობის სხვაგვარი უზრუნველყოფის ფაქტზე დაიწყო.

მათი განცხადებით, სამსახური შემჭიდროებულ ვადებში ჩაატარებს ყველა საჭირო საგამოძიებო და საპროცესო მოქმედებას.

საქართველოში აკრედიტებული დიპლომატების პირადი მონაცემების შემცველი ფურცლები თბილისში, ქუჩაში იპოვეს. კომპანიის წარმომადგენელი, რომელიც ამ დოკუმენტაციაზეა პასუხისმგებელი, ამბობს, რომ ფაილები გადასაყრელად გამზადებული და ჩამოწერილია.