პერსონალურ მონაცემთა დაცვის სამსახურმა დიპლომატების პირადი მონაცემების უსაფრთხოების უზრუნველსაყოფად მიღებული ზომების შესწავლა დაიწყო. ასე ეხმაურება სამსახური მედიაში გავრცელებულ ინფორმაციას, დიპლომატიური კორპუსის წარმომადგენელთა პირადი ინფორმაციის შემცველი ფაილების საჯარო სივრცეში აღმოჩენასთან დაკავშირებით.

"მედიაში აღნიშნული ინფორმაციის გავრცელებისთანავე, ვინაიდან სიუჟეტი შეიცავს სამსახურის კომპეტენციას მიკუთვნებულ საკითხს, დაუყონებლივ დაიწყო აღნიშნულის, მათ შორის, მონაცემის უსაფრთხოების უზრუნველსაყოფად მიღებული ზომების შესწავლა. ასევე, თუ შემოწმების შედეგად გამოვლინდება შესაძლო დანაშაულის ნიშნები, სამსახური დაუყოვნებლივ მოახდენს საზოგადოებისა და შესაბამისი საგამოძიებო ორგანოს ინფორმირებას", — ნათქვამია განცხადებაში.

სამსახურში ამბობენ, რომ პირადი მონაცემების შემცველი დოკუმენტების შესაძლო ხელმისაწვდომობის ფაქტზე ინფორმაცია შინაგან საქმეთა სამინისტროდან მიიღეს. მათივე თქმით, თუ შემოწმების შედეგად გამოვლინდება შესაძლო დანაშაულის ნიშნები, სამსახური საზოგადოებასა და შესაბამის საგამოძიებო ორგანოს ინფორმაციას დაუყოვნებლივ მიაწვდის.

მედიაში გავრცელდა ინფორმაცია, რომ საქართველოში აკრედიტებული დიპლომატების პირადი მონაცემების შემცველი ფურცელები თბილისში, ქუჩაში იპოვეს. კომპანიის წარმომადგენელი, რომელიც ამ დოკუმენტაციაზეა პასუხისმგებელი, ამბობს, რომ ფაილები გადასაყრელად გამზადებული და ჩამოწერილია.