საქართველოში პანდემიით გამოწვეული შეზღუდვების უდიდესი ნაწილი მოხსნილია — ქვეყანა ტურიზმის აღდგენის მოლოდინშია. მიმდინარე წლის იანვარ-მაისში უცხოელმა ვიზიტორებმა 1 051 736 ვიზიტი განახორციელეს, რაც 2019 წლის იმავე პერიოდის მონაცემს 58%-ით ჩამორჩება.

რატომ არის მნიშვნელოვანი: პანდემიამდე ტურიზმი საქართველოს ეკონომიკის მნიშვნელოვან ნაწილს შეადგენდა. Covid 19-მა სექტორს დამანგრეველი დარტყმა მიაყენა.

  • ეს იყო ერთ-ერთი მიზეზი, რის გამოც 2020 წელს საქართველოს ეკონომიკა 6,8%-ით შემცირდა.
  • როგორც წესი, ტურიზმიდან მიღებული შემოსავლები ეროვნული ვალუტის გამყარებასაც უწყობს ხელს.

რიცხვებში: მიმდინარე წელს, პანდემიამდელ პერიოდთან შედარებით, ტურიზმი საქართველოში 42%-ით არის აღდგენილი.

  • 2019 წლის პირველ ხუთ თვეში უცხოელმა ვიზიტორებმა საქართველოში 2 501 970 ვიზიტი განახორციელეს,
  • 2020 წლის იმავე პერიოდში — 1 191 172,
  • ხოლო 2021 წელს — 317 462.

დეტალები: მიმდინარე წლის იანვარ-მაისში საქართველოში ყველაზე მეტი ვიზიტორი თურქეთიდან, რუსეთიდან და სომხეთიდან ჩამოვიდა.

  • 2022 წლის პირველი ოთხი თვის ჯამში ქვეყანაში ყველაზე მეტი თანხა რუსეთისა და ბელარუსის მოქალაქეებმა დახარჯეს.
  • ჯამში, 2022 წლის პირველ ოთხ თვეში უცხოური ტურიზმიდან 582 მილიონი დოლარის შემოსავალი მივიღეთ.

თუმცა, 2019 წლის იმავე პერიოდთან შედარებით ტურისტული შემოსავალები 31%-ით არის შემცირებული.