განათლების სამინისტრო გუშინ, 10 ივნისს თბილისის სახელმწიფო უნივერსიტეტში განვითარებულ მოვლენებს ეხმაურება და აცხადებს, რომ გმობს პროტესტის გამოხატვის იმ ძალადობრივ ფორმებს, რომელსაც ადგილი ჰქონდა.

"სამინისტროსთვის მიუღებელია ყოველგვარი ძალადობრივი ქმედება და შესაბამისად, გმობს პროტესტის გამოხატვის იმ ძალადობრივ ფორმებს, რომელსაც ადგილი ჰქონდა 10 ივნისს თბილისის სახელმწიფო უნივერსიტეტში. სამინისტრო პატივს სცემს თითოეული სტუდენტის გამოხატვის თავისუფლებას, თუმცა პროტესტის ძალადობრივი ფორმა დაუშვებელია.

იმედს გამოვთქვამთ, რომ ყველა გამოწვევის დაძლევა აკადემიური სასწავლო სივრცისა და საუნივერსიტეტო საზოგადოებისთვის შესაბამის ფორმატში მოხდება", — ვკითხულობთ განცხადებაში.

10 ივნისს სტუდენტთა ნაწილმა რექტორის კაბინეტი დაიკავა. თბილისის სახელმწიფო უნივერსიტეტის განცხადებით, სტუდენტთა პროტესტმა მიიღო ძალადობრივი ფორმა. მათი თქმით, სამართალდარღვევის გამოვლენის შემთხვევაში ჩატარდება მოკვლევა, სტუდენტების საკითხი გადაეცემა უნივერსიტეტის ეთიკის კომისიას.

დღეს სტუდენტურმა მოძრაობამ ბოდიში მოიხადა "პროტესტის გამოხატვის თავისუფლების გადამეტებისთვის" და აღნიშნა, რომ სიტუაციის გამწვავება ლექტორ რამაზ ხომერიკის აქციაზე გამოჩენამ გამოიწვია.

თსუ-ის სტუდენტები სწავლის აუდიტორიაში დაწყებას აპროტესტებდნენ და სემესტრის ჰიბრიდულ რეჟიმში დასრულებას ითხოვენ. მათი თქმით, ამ დროით ბინის დაქირავება არ შეუძლიათ და სამსახურის დაკარგვის საფრთხე ექმნებათ.

11 მაისს განათლების სამინისტრომ თბილისის სახელმწიფო უნივერსიტეტს მოუწოდა, 2021-2022 სასწავლო წელი ჰიბრიდულ რეჟიმში დაასრულოს. მათი თქმით, თსუ-მ მაქსიმალურად უნდა გაითვალისწინოს სტუდენტების მდგომარეობა.

იმავე დღეს თბილისის სახელმწიფო უნივერსიტეტმა გააკეთა განცხადება და თქვა, რომ 2021-2022 სასწავლო წლის გაზაფხულის სემესტრში სასწავლო პროცესი 13 მაისიდან ჰიბრიდული ფორმატით წარიმართება. თუმცა, უნივერისტეტი ამბობს, რომ სწავლის ფორმატის თაობაზე გადაწყვეტილებას ფაკულტეტები მიიღებენ.

30 მაისის განცხადებით კი ცნობილი გახდა, რომ სტუდენტები ფინალური გამოცდების ჩაბარებას თბილისის გარდა, ქუთაისში და ახალციხეში შეძლებენ.