პრემიერმინისტრ ირაკლი ღარიბაშვილის განცხადებით, ბოლო კვირების განმავლობაში პრეზიდენტის ყველა ოფიციალურ მომართვას ხელი მოაწერა. მისი თქმით, სხვა ქვეყნებში ვიზიტთან დაკავშირებით პრეზიდენტისგან მიმართვები არ მიუღიათ.

"რაც შეეხება ქალბატონი პრეზიდენტის მიერ ნახსენებ ვოიაჟს, მე მინდა, შემდეგი რაღაც განვუმარტო მოქლაქეებს, რომ ბოლო რამდენიმე კვირის განმავლობაში ყველა ოფიციალური მომართვა, რაც ჩვენ მივიღეთ პრეზიდენტისგან, მე ყველაფერზე ხელი მოვაწერე და ყველა მოთხოვნა, ყველა მისი თხოვნა და მომათრთვა დავაკმაყოფილე.

გახსოვთ, რომ ქალბატონი პრეზიდენტი იმყოფებოდა გერმანიაში, საფრანგეთში, ახლა იტალიაში იყო და საკვირველია ფაქტი, რომ თავად ეს განცხადება ქალბატონმა სალომემ გააკეთა ბრიუსელიდან, მაშინ ყველას ვუსვამ კითხვას, რომ თუ მთავრობა ბლოკავს პრეზიდენტს, როგორც ითქვა და არ უშვებს არსად, ევროპის დედაქალაქში, ბრიუსელში როგორ აღმოჩნდა? რაც შეეხება სხვა ქვეყნებში ვიზიტს, მე მინდა, ჩვენს მოქალაქეებს განვუმარტო სრული პასუხისმგებლობით, დღეის მდგომარეობით არავითარი სხვა მომართვა სხვა ქვეყნებში ვიზიტთან დაკავშირებით არ შემოსულა. მე, რა თქმა უნდა, ვხელმძღვანელობ წესების და კანონების მიხედვით", — თქვა მან.

გუშინ, 10 ივნისს პრეზიდენტმა, სალომე ზურაბიშვილმა განაცხადა, რომ საფრანგეთში, პოლონეთსა და უკრაინაში ჩასვლა სურდა, თუმცა კიდევ ერთხელ მიიღო უარი. მისი თქმით, უთხრეს, რომ "მთავრობამ ყველაფერი გააკეთა ჩვენი კანდიდატურის მხარდასაჭერად".