ბულგარეთის საფეხბურთო კავშირის განცხადებით, ავტოსაგზაო შემთხვევის შედეგად დაშავებულ ფეხბურთელს, ტოდორ ნედელევის ოპერაცია ჩაუტარდა. მათი თქმით, ოპერაცია წარმატებით დასრულდა. განცხადებაში აღნიშნულია, რომ სხვა ფეხბურთელები და ბულგარეთის შტაბის წევრები არ დაშავებულან.

საფეხბურთო კავშირის ინფორმაციით, ფეხბურთელს თავში მინის ნამსხვრევი მოხვდა და კრანიოცერებრალური ტრავმა მიიღო. ნედელევი ქართველი ექიმების მეთვალყურეობის ქვეშ რჩება, მას მეთვალყურეობს ეროვნული ნაკრების ექიმიც.

თბილისის აეროპორტიდან სასტუმროსკენ მიმავალ გზაზე ბულგარეთის ნაკრების ორი ავტობუსიდან ერთ-ერთი ავარიაში მოყვა. ბულგარეთის საფეხბურთო კავშირის ინფორმაციით, მძღოლმა საჭის დამორჩილება ვერ შეძლო.

შინაგან საქმეთა სამინისტროს განცხადებით, მომხდარზე გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.