სამოქალაქო ინიციატივა გადადგი ნაბიჯი ევროპისკენ საქართველოზე ევროპარლამენტის რეზოლუციას ეხმაურება. მათი შეფასებით, ხელისუფლების რეაქცია მიღებულ რეზოლუციაზე ანტიევროპული და ქვეყნისთვის საზიანო იყო.

ისინი ხელისუფლებას ქმედითი ნაბიჯების გადადგმასა და რეზოლუციაში ასახული პრობლემების მოსაგვარებლად ძირეული რეფორმების განხორციელებისკენ მოუწოდებენ.

"გადადგას კონკრეტული ნაბიჯები იმის სადემონსტრაციოდ, რომ ასრულებს ქართველი ხალხის დაკვეთას, რომლის 80%-ზე მეტი წლების მანძილზე სტაბილურად უჭერს მხარს და ცალსახად და მკაფიოდ სურს ევროკავშირში ჩვენი ქვეყნის გაწევრიანება. ჩვენ, ჩვენი მხრივ, დაგროვილი ექპერტიზით და რეფორმების მზა კონცეფციებით მზად ვართ ხელი შევუწყოთ პროცესს, რომელიც ჩვენი ხალხის ევროპულ მომავალს და კანდიდატის სტატუსის მიღებას რეალისტურს გახდის", — ნათქვამია განცხადებაში.

ევროპარლამენტმა საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ რეზოლუცია მიიღო, რომელსაც მხარი 308 დეპუტატმა დაუჭირა. წინააღმდეგი 218 იყო.