ევროპარლამენტარი მარკეტა გრეგოროვა აცხადებს, რომ პრემიერმინისტრის მხრიდან ისმის მათ მიმართ შეურაცხყოფა და წარმოდგენა არ აქვს, თუ რატომ არ მოსწონს ირაკლი ღარიბაშვილს ევროპარლამენტი.

"გარწმუნებთ, ჩვენი საფუძველი არ გამხდარა ფეიკნიუსი. ჩვენი საფუძველი გახდა ფაქტები და მონაცემები. ჩვენ ველაპარაკებით, როგორც ქართული ოცნების, ისე ოპოზიციის, არასამთავრობოებისა და სამოქალაქო საზოგადოების წარმომადგენლებს, რომლებიც აფასებენ მედიათავისუფლებას და ობიექტურად ადევნებენ თვალს სხვადასხვა საქმეს. ჩვენ მკაფიო ვართ ამ საკითხზე. რა თქმა უნდა, პრემიერის მხრიდან ჩვენს მიმართ ვისმენთ შეურაცხყოფას, მას ნამდვილად არ მოსწონს ევროპარლამენტი, მაგრამ წარმოდგენა არ მაქვს რატომ", — ამბობს ის ფორმულას ეთერში. [ფორმულას თარგმანი

ევროპარლამენტმა საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ რეზოლუცია მიიღო, რომელსაც მხარი 308 დეპუტატმა დაუჭირა. წინააღმდეგი 218 იყო.

8 ივნისს ევროპარლამენტში ამ საკითხზე დებატები გაიმართა. ევროპარლამენტარებმა საქართველოში მედიაგარემო კრიტიკულად შეაფასეს და შეშფოთება გამოხატეს მთავრობის დამოკიდებულებებზე, რაც რეზოლუციაში დაწვრილებით აისახა.

ტექსტის ერთ-ერთი ყველაზე მნიშვნელოვანი პუნქტი ქართული ოცნების დამფუძნებლის, ბიძინა ივანიშვილისთვის სანქციების დაწესების მოწოდებას და მის კრემლთან ურთიერთობას ეხება. რეზოლუცია საქართველოს მთავრობას ზოგადი პრინციპებისა და მოვალეობების დაცვისკენ მოუწოდებს, ამასთანავე მასში განხილულია კონკრეტული საკითხები, რაზეც ხელისუფლებას შესაბამისი რეაგირება უნდა ჰქონდეს, როგორიცაა 5 ივლისის, ნიკა გვარამიას და მიხეილ სააკაშვილის საქმეები.